كود – ورزازات //

توفات الممثلة الفرنسية-المغربية ناديا فارس، ليلة الجمعة، على  57 عام، بعدما غرقات فلابسين فالعاصمة الفرنسية باريس.

حسب المصادر الفرنسية لقاوها غارقة نهار 11 أبريل وسط لابسين فواحد الكلوب الرياضي، مني كانت كتعوم، وبقات تحت الما شحال من دقيقة  قبل ما يجبدوها عاد دار لها الإسعاف  ومشات السبيطار  فحالة غيبوبة ، قبل ماتموت فالإنعاش من بعد.

بناتها علنو الخبر وقالو بلي فقدو الأم ديالهم ،ناديا فارس تزادات فمدينة مراكش عام 1968، ومن بعد مشات لفرنسا فين بدات المسيرة الفنية ديالها. بانت أول مرة فالتلفزة فمسلسل “Navarro”، ومن بعد دخلات لعالم السينما.

فارس تشهرات ففيلم Les Rivières pourpres (الأنهار القرمزية)، اللي خلاها تولي من الوجوه المعروفة فسينما الإثارة، وزادت تألقات ففيلم Nid de ، فالتلفزة كان عندها حضور قوي، خصوصاً فمسلسل Marseille، اللي تزادت تشهرات به عالمياً.

فحياتها الشخصية، كانت مستقرة بين فرنسا ومريكان، وركزات بزاف على العائلة ديالها فتواخيرة، وبعدات شوية على الأضواء ، وخا أنها بقات كتخدم فمجال التمثيل.

ناديا كانت معروفة بأدوار عيالات قويات وجريئات، وخلات وراها مسيرة فنية طويلة دازت أكثر من 30 عام، عامرة بالأعمال اللي بقات محفورة فذاكرة الجمهور.

برحيلها، السينما الفرنسية خسرت فنانة مميزة، والمغرب حتى هو فقد وحدة من الوجوه اللي شرفاتو فنياً.