كود – وكالات//

تزوج لاعب الرگبي الإنجليزي السابق داني سيبرياني بالممثلة الأمريكية آنا لين ماكورد، فحفل فالدار بحضور العائلة والصحاب.

آنا لين، المعروفة بأدوارها فمسلسلي «90210» و«Nip/Tuck»، اختارت لبسة بيضة ديال العرايسات أما داني لبس لبسة كحلة بلا كرافاطة.

ولكن قبل العرس، الكوبل ناض عليهم الصداع حيث  دارو صفحة إلكترونية كيطلبو فيها من العائلة والصحاب يساهمو فمصاريف العرس، مني قدرو يجمع 10 آلاف و660 جنيه إسترليني.

الانتقادات كانت صعيبة، خصوصاً أن داني سيبرياني معروف كلاعب سابق فالمنتخب الإنجليزي، وكتقدر بعض التقارير ثروتو ب 4 ملايين جنيه إسترليني، أما آنا لين حتى هي عندها مسار طويل فهوليوود وجمعات ثروة مهمة. واعتبر بعض المنتقدين أن طلب تمويل العرس ما مناسبش مع المستوى المادي اللي كيتنسب للزوجين.

آنا لين خرجات تشرح موقفها، وقالت بلي كان كيحصاب أن لائحة الهدايا والرابط ديال المساهمات وصل غير للمعروضين، وما كانتش عارفة أنه ولى مفتوح للعموم. وضافت أن بعض الناس دخلو للموقع وتبرعو بفلوس صغيرة غير باش يسبوهوم.

وخا هكاك آنا لين بان عليها فرحانة  ونشرت من بعد الحفل صورة وهي فالفراش حدّ راجلها، وكتبت أنها تزوجات بـ«حب حياتها»،
وحسب المعطيات خاتم الزواج ديال آنا لين كان  ألماسة بـ15 قيراط مرصعة بالذهب.

ودابا، من بعد الحفل الأول فـلوس أنجلوس، باقي الكوبل على موعد مع احتفال ثاني فـلندن وثالث فـكمبوديا،أما السؤال لي طراحاتو الصحافة البريطانية واش المشاهير اللي عندهم فلوس كبيرة من حقهم يطلبو من الضياف يخلصو عرسهم؟