كود هند لكلاوي مراكش ////

فشهر دجنبر 2024 قدمات “جون افريك” بنت الباشا المنصوري ك”مرا حديدية” وتغزلات فيها. ما كانش ففراسنا باللي “المقيم العام” ديال هاد الوقت كيوجد تعيين للي بغى من الباشاوات وباللي ما بقيناش محتاجين لا للانتخابات ولا والو.

هاد السيمانا رجع المقيم العام” وعين بنت الباشا رئيسة للحكومة مرة اخرى. ما بقيناش محتاجين لا انتخابات 2026 التشريعية ولا لدستور 2011 اللي كيعطي لسيدنا صلاحية تعيين رئيس الحكومة من الحزب المتصدر للانتخابات التشريعية.

“المقيم العام” ديال هاد الوقت “جون افريك”  اختار حفيدة احمد المنصوري اللي كان مساعد للقائد العيادي. احد اشهر القياد زمن الاستعمار الفرنسي.

اش قالت هاد المجلة اللي ضصروها شي رجال فالمخزن؟ قالت باللي بنت الباشا باللي محامية. واش عمر لمغاربة شافوها دافعات على شي قضية شغلات الرأي العام؟ حنا ما فراسناش. المقيم العام “جون افريك” جبدو عائلتها وكتبو “كتمثل هاد النخبة اللي منحادرة من العائلات الكبيرة المغربية” القادرة على فرض سلطتها فنظام سياسي غالبا مسدود. ما شرحوش لينا شكون هاد العائلة. شفتو كيفاش كيفكرو. نفس تفكير الاستعمار.

تكون “من عائلة كبيرة” كافية باش توصل لرئاسة الحكومة. الانتخابات وتعيين سيدنا٬ عند هاد المجلة المعروفة كيفاش كتخدم٬ ما عندها اهمية.

زادت هاد  “المقيم العام”٬ باللي مقربة من مستشار سيدنا فؤاد عالي الهمة. واو مشينا فيها. ما فراسناش باللي الدستور ديال 2011 كيعطي رئاسة الحكومة لصحاب مستشار الملك. وشكون هو الهمة؟ راه غير خدام عند سيدنا. رئيس الدولة هو سيدنا. كلشي لخراين كيخدموه وكيخدمو عندو وما عندهم حتى سلطة بلا سيدنا. باش تعرفو العقلية الاستعمارية ديال هاد المجلة.

باش بغات تبين باللي كدير السياسة كذبات المجلة وقالت باللي راه دارت خرجات ضد بنكيران. شفتي هاد المقيم العام كيشوف حوايج ما كيشوفهمش لمغاربة. وفين عمرها حلات فهمها ولا دافعات على قضايا مجتمعية. نهار مشات للزلزال دخلات سيدنا بلا مناسبة.

وسالى المقيم العام مقالو بتعيينها رئيسة للحكومة. نفس المجلة اللي سماتها٬ كيف كتبنا فللول٬ باللي امرأة حديدية. عمركم شفتو شي امرأة حديدية غابرة ما حاضراش فكاع النقاشات السياسية او المجتمعية؟ ابدا. غير المقيم العام جون افريك كيضرب الكارطا غير بوحدو.