كود – وكالات //

دخل ملف الحريگ بين المغرب وإسبانيا مرحلة جديدة، من بعد ما أكدات المفوضية الأوروبية أن القانون الأوروبي كيسمح لإسبانيا ترجع للمغرب المهاجرين اللي كاينين فسبتة بما فيهم القاصرين .

وقال ماركوس لاميرت، الناطق باسم المفوضية الأوروبية فالشؤون الداخلية، اليوم فندوة صحافية فبروكسيل حسب ما نقلات وسائل الإعلام الأوروبية، بلي التوقع هو أن “جميع الناس اللي باقيين بشكل غير قانوني فسبتة غا يتم إرجاعهم”.

وزاد أن الهدف ديال المفوضية هو إرجاع كلشي، وأن السلطات الإسبانية والمغربية خاصها تخدم مع بعضها باش تتم عملية الرجوع بشكل فعلي.

ملف القاصرين عندو أهمية خاصة، حيث إن إرجاعهم ما كيتدارش بنفس الطريقة اللي كتطبق على البالغين، وإنما كيرتبط بإجراءات قانونية وضمانات خاصة بحماية الطفل، والتأكد من الوضعية العائلية ديالو والمصلحة  ديالو.

وفوقت كيبان فيه أن مدريد وبروكسيل كيميلو أكثر لخيار إرجاع الحراگة ،كيبقى التنسيق مع الرباط ضروري باش تتم عمليات الرجوع وفق القانون، خصوصاً ملي كيكون الأمر متعلق بالقاصرين.