كود – وكالات//

قالت شبكة CBS News، اليوم الأحد، بلي المفاوضات بين إيران وسلطنة عُمان بخصوص تنظيم الملاحة فمضيق هرمز والممرات البحرية التابعة لهم وصلات لمراحل متقدمة.

وكانت صحيفة فايننشال تايمز سبق وكشفات أن إيران وعُمان كيناقشو اتفاق جديد باش ينظمو حركة السفن، بتحديد العدد اللي غادي دوز من المياه الإيرانية والمياه العُمانية.

وحسب المصادر، الطرفين تناقشو حتى على كيفاش يتم توزيع السفن بين الممر الجنوبي القريب من السواحل العُمانية، والممر اللي داخل المياه الإقليمية الإيرانية، بهدف تحسين سلامة وانسيابية الملاحة فواحد من أهم الممرات البحرية فالعالم.

ومن جهتو، قال موقع أكسيوس الأمريكي، نقلاً عن مصادر مطلعة، بلي المفاوضات بين إيران وعُمان بخصوص الملاحة فمضيق هرمز حققات تقدم مهم.

وجا هاد التطور بعدما علنات إيران، اليوم الأحد، أنها تقدمات فالمحادثات مع سلطنة عُمان على تدبير مضيق هرمز، اللي كيعتبر ممر استراتيجي لتجارة النفط والغاز، وكتشرف إيران وعُمان على ضفافو.