وكالات//

ولات أغنية كانتري جديدة، بصوت مولّد بالذكاء الاصطناعي، هي الأولى فمبيعات الأغاني الأمريكية هاد السيمانة، فواحد الحدث اللي ما وقعش من قبل.

الأغنية سميتها Walk My Walk وغنّاتها فرقة سميتها “بريكينغ روست”، وخدات المرتبة الأولى فـ لائحة مبيعات أغاني الكانتري الرقمية ديال مجلة بيلبورد، حسب الإحصائيات اللي خرجات نهار الاثنين.

الإعلام الأمريكي كيقول باللي هاد الفرقة ما عندها حتى مغني معروف، حيت الصوت والفرقة كاملين تدارو بتقنية الذكاء الاصطناعي.

رغم أن الفرقة ما أكدتش رسمياً فحساباتها باللي استعملات الذكاء الاصطناعي، إلا أن الصور، والرسومات، والفيديوهات ديالهم كلهم باينين مخدمين بتقنيات AI، وهاد الشي خلا عالم الموسيقى يصنفهم كـ “فنان ذكاء اصطناعي”.

برامج التعرف على الموسيقى، حسب وكالة فرانس برس، بينات أن الأغنية مولّدة بالذكاء الاصطناعي بنسبة ما بين 60% و90%.

وكيتقال باللي كاتب الأغنية هو واحد الاسم سميتو أوبيير ريفالدو تايلور، واللي مرتبط فقط بمشروع ذكاء اصطناعي معروف باسم Dave Beats AI.