كود -وكالات//

المغنية الكولومبية كارول جي علنات على جولة عالمية جديدة سميتها “Traveling the World Tropitour”، وغادي تزور فيها تقريباً كتر من 20 دولة فأمريكا وأوروبا، ولي منهم إسبانيا اللي غادي تكون محطة مهمة ف البرنامج ديالها.

فإسبانيا، الجمهور غادي يكون عندو فرصة يشوفها فـ2027، حيث غادي تدير حفلات فبرشلونة، إشبيلية، ومدريد، البداية غادي تكون فـ3 يونيو ف برشلونة، ومعاها حتى حفل ثاني ف نفس المدينة. من بعد غادي تمشي لإشبيلية في 11 و12 يونيو، ومن بعد مدريد في 24 و25 يونيو، يعني حفلات متتابعة فمدن كبار.

المنظمين قالو بلي التكيت ديال البيع بداو فبعض المنصات، ومن بعد غادي يتحلو للبيع العام بثمن كيبدا تقريباً من 70 يورو. المعجبين خاصهم يكونو مسجلين من قبل باش يقدرو يشريو فمرحلة البيع الأولى.

الجولة ديال كارول جي ماشي غير ف إسبانيا، ولكن غادي تدوز حتى من دول كثيرة ف أمريكا اللاتينية، أوروبا، ومريكان واللي غادي دير فيهم 40 حفلة، هاد الجولة كتبين النجاح الكبير ديالها ف عالم الموسيقى اللاتينية، خصوصاً ف الراب والريغيتون، حيث ولات من أكبر الأسماء فالساحة العالمية وكتستقطب جمهور كبير فكل بلاصة .

كتعتابر النجمة الكولومبية كارول جي (Karol G) من أكثر الفنانات اللي محبوبين فالعالم وحتى فالمغرب، وسبق ليها سجلات حضور قوي فمهرجان موازين فالرباط عام 2019 بحفل أسطوري حضروه الآلاف ديال الناس. وعبّرات فداك الوقت على حبها الكبير للمغرب ملي طلعات فوق الخشبة وهي هازة الراية المغربية.