كود سبور//

غاتبدا غدا الثلاثاء 22 أبريل 2025، فالعاصمة المغربية الرباط، أول نسخة من كأس إفريقيا للأمم لكرة القدم داخل القاعة للسيدات، وهذا الشي فمجمع مولاي عبد الله، وغاتبقى المسابقة حتى 30 من هاد أبريل، وهذه البطولة كاتأكد ان المغرب ولى وجهة للكرة الافريقية، وخيار قوي واول للكاف لتظيم البطولات القارية الكبيرة، حيث المملكة طورت بزاف من البنية التحتية الرياضية اللي عندها، والمغرب بجدارة واستحقاق صبح رائد فتظيم التظاهرات الرياضية وغيرها، ولكن السؤال اللي المطروح هنا، هو علاش تاني اختيار الرباط لتنظيم بطولة كاس أفريقيا لفوتسال للعيالات، واخا ماشي مدينة ديال الكورة، وعلاش كلشي مهلي فيها ومزيان، وعلاش بالمقابل تهمشات الدار البيضاء، واخا هي المدينة المعروفة بالكورة وفيها اشهر 2 فراقي فالقارة الافريقية، ومركب معروف عالميا بحال مركب محمد الخامس، وعلاش القاعة المغطاة ديالو ما كانتش تتصلح وتنظم فيها هذه البطولة.

راه ناس كازا ولاو كايحسو ان مدينتهم مهمشة، وان كاينة شي مؤامرة ضدها وكاين شي لعب فالكواليس باش كازا ما تنظمش المسابقات الكروية القارية والماتشات المهمين، حيث هذا هو التفسير اللي ولى عند بزاف ديال بيضاوا، واخا هذا الشي راه مستبعد، ولكن ملي كايشوفو ان كاس افريقيا لفوتسال الرجال تنظم العام اللي فات فالرباط، وقبل منو كاس افريقيا لاقل من 23 عام، والمنتخب المغربي فكاس افريقيا لاقل من 17 عام، داوه لعبوه فالمحمدية وكازا لعبو فيها منتخبات اخرى، واختيار 4 التيرانات من الرباط لتنظيم كاس أفريقيا2025، ومركب محمد الخامس عطاوه ماتشات هامشيين، وتيران الحسن الثاني الكبير اختارو له موقع خارج كازا وفمدينة بنسليمان باش يبنيوه ويحتضن ماتشات كاس العالم 2030، هذا الشي كايدخل الشك عند ناس الدار البيضاء، بأن هذا التهميش اللي كاتعرض له المدينة مقصود، بالإضافة إلى حالة الضعف اللي وصلو لها فراقيهم الرجا والوداد، وستاد دونور اللي عام ونص وهو مسدود، وهذا الشي بلا ما نهضرو على معرض الكتاب اللي جا الوزير مهدي بنسعيد وهربو من كازا للرباط، بلا حتى شي مبرر مقنع، مع العلم ان بزاف من المتتبعين طالبو باش يرجع معرض الكتاب لكازا المدينة التاريخية ديالو.

وبالرجوع لكاس افريقيا لفوتسال العيالات، راه مشاركين فالنسخة الأولى من البطولة 9 ديال المنتخبات، مفرقين على ثلاث مجموعات، من بينهم المنتخب الوطني المغربي وغايلعب كل منتخب 2 ماتشات فدور المجموعات. وغايتأهل للدومي فينال المنتخب المتصدر لكل مجموعة، بالإضافة إلى أفضل منتخب محتل المركز الثاني، ومشارك المنتخب المغربي، فالمجموعة الأولى إلى جانب منتخبي الكاميرون وناميبيا، أما المجموعة الثانية فيها أنگولا، ومصر، وغينيا، والمجموعة الثالثة فيها منتخبات السنغال، وتنزانيا، ومدغشقر.

وللاشارة فالمنتخبين اللي غايلغبو الفينال غايمثلو القارة الإفريقية فكأس العالم لكرة القدم داخل القاعة للسيدات، المقررة ما بين 21 نونبر و7 دجنبر 2025 فالفلبين.