الرئيسية > آراء > المغرب مكانش موجه لسياحة الشباب وماموفر ليهم والو ومع ذلك فأزمة كورونا راه هوما لي لقاهم.. شباب أجانب حصلو فالمغرب كيحطو فيديوات زوينة كتعرف بالمغرب وبثقافتو وكيديرو اشهار كبير ومهم للسياحة
07/08/2020 17:00 آراء

المغرب مكانش موجه لسياحة الشباب وماموفر ليهم والو ومع ذلك فأزمة كورونا راه هوما لي لقاهم.. شباب أجانب حصلو فالمغرب كيحطو فيديوات زوينة كتعرف بالمغرب وبثقافتو وكيديرو اشهار كبير ومهم للسياحة

المغرب مكانش موجه لسياحة الشباب وماموفر ليهم والو ومع ذلك فأزمة كورونا راه هوما لي لقاهم.. شباب أجانب حصلو فالمغرب كيحطو فيديوات زوينة كتعرف بالمغرب وبثقافتو وكيديرو اشهار كبير ومهم للسياحة

محمد سقراط-كود///

من بين الحاجات الزوينة لي طرات فهاد الجايحة هي الكم الكبير ديال الأجانب لي بقاو حاصلين في المغرب ومع ذلك باقي عاجبهم الحال ومستمتعين وكيصورو فيديوات ديما كيعرفو بهاد البلاد لي كتبان في الأفلام عبارة على صحرا ورملة وجمل وأتاي، ولكن هاد الناس لي بقاو هنا وخصوصا الأمريكيين دارو خدمة زوينة بزاف للمغرب وبينو صورة زوينة ديال مغرب متنوع ماشي بداك النمطية لي كاين إصرار مؤكد على أنه يظهر بيها في الأفلام والمسلسلات، هاد اليوتوبرز عرفوا بشباب المغرب المتفتح الواعي لي متقبل الإختلاف وولد الوقت وعندو قيم وأخلاق وثقافة، وعرفو بالمعاملة الزوينة للدولة للناس لي بقاو حاصلين هنا، وكيفاش تشاركو معاهم المغاربة شعبا ودولة وجمعيات هاد المعاناة.

الموشكيل هو أن المغرب عمرو كان موجه لسياحة الشباب بل العكس المغاربة كيتجنبوا أصلا يخدموا مع الشباب وكيفضلو الأسر، أو الرجال الكبار، أما الشباب لي هازين صاكهم وكيدورو كيسميوها سياحة الحازقين وسياحة رايبي والحرشة والجقير، مكاينش الهوستلات بزاف في المغرب وممتوفرينش بالشكل الكافي وشي مناطق مكاين فيها والو أصلا، وداكشي لي كاين قديم وخانز، وبالنسبة للمخيمات الأمنة والمجهزة راه قليلة بزاف وكاينة في بعض المدن فقط وبزاف ديال البلايص لي التخيام فيها واعر مكاينش فيها مخيم، كندوي على مخيم بالطواليطات نقيين والدوش والويفي والتيساع والنقى وبثمن مناسب، الجنوب الشرقي موجه لسياحة الكرافانات ومراكش مموجهاش أصلا لسياحة دوي الدخل المحدود حتى من الأجانب، إما اللوكس غيما سير تسارى فبنكرير.

وفاللخر فعز هاد الأزمة لي كتبان باقا مطولة المغرب لقى الخير في السياح الشباب وحتى هوما لقاو فيه الخير، لي كالسين كيوثقوا ويعرفوا بالبلاد وثقافتها ومناطقها وناسها وماكلتها، وكيمسحو داك الصورة النمطية ديال الجمال وجامع لفنا والحلقة والنعاج سارحة وسط المدينة والناس لابسين حوايج الستينات لي كتبان في الأفلام، وبينو على أن من الرباط العاصمة حتى لفيلاج صغير نواحي اكادير أو صويرة، أن المغرب بلاد فيه مايتشاف وفيه مايتعاش وغني بالتجارب ، دابا خاص غير مستقبلا الدولة تديها شوية فسياحة الشباب راه حتى الى كانو مكيخسروش بزاف ولكن راه كيوثقو ويعرفوا ويديرو إشهار مجاني هاعلاش خاص توجد ليهم اللوجيستيك ديالهم.

موضوعات أخرى