الرئيسية > آراء > المغرب مافيهش الحرب الأهلية ! ماعندناش ملشيات الجنجويد باش تولي كل زنقة فيها گارديان !كاين الأمن البوليس الجدارمية الكاميرات ! ماشي معقول المواطن يولي فريسة للعصابات ديال الشماكرية و باردين الكتاف كايخلص ليهم إتاوة باش يسطاسيوني فالشارع العام لي من حقو
04/05/2022 19:00 آراء

المغرب مافيهش الحرب الأهلية ! ماعندناش ملشيات الجنجويد باش تولي كل زنقة فيها گارديان !كاين الأمن البوليس الجدارمية الكاميرات ! ماشي معقول المواطن يولي فريسة للعصابات ديال الشماكرية و باردين الكتاف كايخلص ليهم إتاوة باش يسطاسيوني فالشارع العام لي من حقو

المغرب مافيهش الحرب الأهلية ! ماعندناش ملشيات الجنجويد باش تولي كل زنقة فيها گارديان !كاين الأمن البوليس الجدارمية الكاميرات ! ماشي معقول المواطن يولي فريسة للعصابات ديال الشماكرية و باردين الكتاف كايخلص ليهم إتاوة باش يسطاسيوني فالشارع العام لي من حقو

سهام البارودي – كود//

المغرب ماشي شي دولة معروفة بالاجرام ! ماشي هوا افريقيا الجنوبية و لا ڤينيزويلا و لا البرازيل ! ايه عندنا الاجرام و لكن بالمقارنة مع دول اخرى نسبة الجريمة عندنا هابطة! و حتى الجرائم الكبيرة فحال القتل مثلا قلال بزاف ! ايوا كيفاش فهاد الدول لي معروفة بالاجرام و فيها الربوبة ديال المجرمين ماكايناش الظاهرة ديال الگارديانات د الطوموبيلات و تجي تال للمغرب و تلقى فكل زنقة عساس ؟

حنا اصلا فالمغرب مامحتاجينش الگارديانات !ماعندناش شي حرب اهلية و لا شي انتفاضات و السلاح رايج و الفوضى بالعكس ! عندنا الأمن و البوليس و الجوندارم و المقدم و الشيخ و المواطنين الحضاية لي مقابلين غا شكون دخل و شكون خرج ! و كانقولو على راسنا بلاد الأمن و الأمان الحمد لله !

اذن علاش مازال منتاشرين عندنا دوك العساسة صحاب الجيليات لي ماكايعسو على تا خصية ؟! و علاش الدولة سادة عليهم عينيها و مخلياهم كاينهبو المواطنين ؟! واش حيت مهنيينها بالجقير ديالهم ؟ حيت مافيها ماتصدع راسها معاهم و دخلهم للحباسات يترباو كاتخليهم مطلوقين على المواطنين كايديو ليهم ديالهم !؟ ماشي معقول ! ماشي معقول تجي الدقة فالمواطن و يولي هوا الفريسة لي خاصها تخلص إيتاوة باش تسطاسيوني فالشارع العام لي هوا ملك للمواطنين كاملين !

البحر باش تمشي ليه خاصك تخلص العساس ! السوق العساس ! المخبزة باش تاخد كوميرا خاصك تخلص العساس و حتى الكوميسارية ! تخايل حتى حدا الكوميسارية كاين عساس ! ولاية الأمن فكازا فالظهر ديالها گاع الزناقي فيهم العساسة فحال الى حنا ماشي فالمعاريف القلب النابض د كازا لي عامر بوليس و كاميرات بل فاقليم دارفور لي ملشيات الجنجويد كايتساراو بكالاش فوق الكتف !

و آطونسيو راه غي السمية ديال ” عساس” أما هوا فالأصل ماكايقدم حتى شي خدمة ! حيت الى تشفرات الطوموبيل و لا ضربات و لا داها ليك الديباناج ماعندك ماتصور منّو ! هوا غا واقف و كايتخلص و صافي ! و كايدخل ملايين صحيح فالشهر و ماكايخلص عليها حتى شي ضريبة !

هاد الضسارة ديال صحاب الجيليات الصوفر خاصها توقف ! اليوم تقتل مواطن و غدا شنو غادي يوقع ؟ راه مصيبة كحلة ! كونصير هاد الجيليات ! كونصير كاينهش المواطن و كايخسر ليه نهارو ! و الدولة خاصها تكون حازمة و دير خدمتها و تحرر الفضاء العام من هاد العصابات لي ولات كاتگريسي عباد الله بالنهار الگهار !

موضوعات أخرى

27/05/2022 20:00

مستعجلات صبيطار “ابن طفيل” فمراكش مسدودة أكثر من عام.. ونقابة باغا تدير وقفة احتجاجية فنهار اجتماع المجلس الإداري برئاسة وزير الصحة

27/05/2022 19:30

5 سنين وهو شاد عليها فبرطمة ودايرها عبدة جنسية ديالو.. جاك بوتيي واحد من اغنى الناس ففرنسا ومول شركة كبيرة ديال التأمين عندها فرع فطنجة “Euro-assurance” تعتاقل بسبب اغتصاب قاصر مغربية والاتجار بالبشر