محمد سقراط-كود//

المغرب حاليا كيعيش حالة حرب بين التخلف والرجعية والريع والفوضى وشرع اليد ممثلة في صحاب الطاكسيات وبين الحداثة والتقدم والمستقبل والرأس مالية وسوق الحرة وكيمثلوها صحاب التطبيقات وهاد الحرب راه خلفات قتلى وجرحى وأرامل وأيتام ولحد الآن وزارة الداخلية كالسة كتفرج، ما القطاع تحرر وفتحات البلاد للتقدم والمستقبل، ماهي بقات متشبثة بالتخلف والرجعية وكتدافع عليها بقوة القانون، ومانعة بصح صحاب التطبيقات يخدموا، موفرة واحد الجو ديال الفوضى كيوفر المكونات الطبيعية لحالة الإقتتال الجماعي لي كتشوفوها بين صحاب الطاكسيات وصحاب التطبيقات، كل مرة خارج فيديو عجيب لمطارة او براكاج ديال واحد من التطبيقات لي كتسالي بكسايد وجرحى وبعد المرات حتى قتلى بحال لي وقع هاد السيمانة.

بإمكانك وقف زحف تطبيق واحد ولكن ليس بإمكانك وقف ربيع التقدم التكنولوجي، أن المغاربة غادي يستعملوا التطبيقات في التنقل راه تحصيل حاصل، وأن الطاكسي بشكله المتخلف الحالي نظام قديم وغادي ينقارض مافيهاش السك وواقع غادي نعيشوه مستقبلا، والأحسن انه يتعاش بشروط المغاربة ماشي كأزمة تعصف بالقطاع، دفاع الداخلية حاليا على الطاكسيات بحال الى كتدافع على الحرث بالمحراث الخشبي في مواجهة التراكتور والمكننة، راه لا يعقل انه في هاد العصر باقي خاصك تخرج للشارع وتبدى تشير لطاكسي وتسولوا فين غادي ويقرر واش يديك أو لا، راه أهم حاجة في العصر الحديث هو سهولة التنقل، والطاكسي في المغرب مكيوفرش هاد الخدمة للأسف، على عكس التطبيقات، الموشكيل هو علاش الطاكسيات ميخدموش بالتطبيقات بحال لي دارو في عدة بلدان وهناو السوق.

في دول شرق آسيا كاين تطبيق گراب، هو تطبيق شامل فيه النقل وايصال الماكلة او أي حاجة وفيه حتى محفظة رقمية ونظام الدفع بالكيو آر، كتدخل لبلاد كتيليشارجي تطبيق واحد كتدير بيه أي حاجة في اليومي ديالك، وكاين موقع آخر فيه جميع خدمات الترفيه وتذاكر الحافلات السياحية او المتاحف او المزارات ورأيتها حاجة في تطبيق واحد وكتخلص بآپل باي، هادشي كيخلق فرق كبير في تجربة السائح والمواطن والمقيم، وكيحسن جودة الخدمات في البلاد، بالاظافة الى تقييم الخدمات وهادشي مكاينش في الطاكسيات،ك وعدة خدمات أخرى في المغرب، راه خاص الداخلية تتحلى بالشجاعة الكافية وتوضع حد لهاد الحرب لي باينة غادي تسالي بفوز التطبيقات او بسخط المغاربة، وهاد الموقف السلبي ديالها غير كيطول من عمر الصراع وغادي يولي بحال الصراع الفلسطيني الإسرائيلي.