سهام البارودي كود//

شي وحدين فرحانين بداك البيان شي رابطة مجلوقة سميتها رابطة علماء المغرب العربي وفاش كايهضرو عليها كايقولو غا “المغرب” ماكايقولوش “العربي” باش مايتفرشوش! زعما راه ديالنا ديالنا!

آسيدي ماديالناش! المغرب فيه رابطة وحدة لي كانعرفوها وديالنا وعندها مصداقية ووزن هي الرابطة المحمدية للعلماء، أما ديك الرابطة د المغرب “العربي” تمشي دخل سوق ريوسكم، هادشي راه سميتو التدخل الأجنبي  l’ingérence étrangère في الشؤون الداخلية للدولة. آش دخل حماركم للفروسية؟ واش حنا محتاجين الدزايرية والتوانسة والموريتانيين يوريونا القوانين باش نعيشو؟ آسيدي دخلو سوق راسكم وطفروه نتوما بعدا فدولكم أما المغرب بعيد كل البعد عليكم.

ولكن راه معروف شكون مشا كايجري يبكي على ديك الرابطة باش تخرج داك البيان، الكتاني طبعا، لي فايت مدوز الحبس مورا أحداث سطاش ماي الإرهابية، هاكاك راجل بلحيتك تعمر مخدة وغادي كاتبكي على البرّاني باش يخرج بيان يهاجم فيه الدولة ديالك؟ ماحشمتيش! بالحق ماشي غريب على حفيد عبد الحي الكتاني لي بايع  بن عرفة وهرب لفرانسا مورا الاستقلال إنه يستقوي بالأجنبي على بلادو.