كود ـ سبور//

بعد محاولات عديدة فالإقصائيات وانسحابات متكررة من التصفيات، قدر المغرب يوصل لكأس إفريقيا لأول مرة فالكاميرون 1972 بقيادة المدرب الوطني عبد الرحمن بلمجدوب.

المغرب وصل لكأس إفريقيا بعد تصفيات تاريخية ضد الجزائر، المغرب كان خسر فالذهاب بالجزائر بـ3.1 ولكن فالإياب فاز بـ3.0 فمقابلة حماسية وتاريخية، توجات مجهودات هاد المجموعة اللي كانت لعبات قبل أول كأس عالم فتاريخ المغرب ف 1970.

رحلات المجموعة المغربية لمدينة دوالا الكاميرونية باش تلعب فالمجموعة اللي كان فيها إلى جانب المغرب، السودان والكونغو والزايير ( الكونغو الديمقراطية).

المجموعة مكانتش سهلة، السودان كانت حاملة اللقب والزايير والكونغو كانو دائمي الحضور فكأس إفريقيا.

المجموعة المغربية كانو فيها لاعبين متمرسين من أمثال الحارس علال وأحمد فرس وبوجمعة ونجاح وخليفة، وكانت عوالة باش تأكد مكانة المغرب العالمية.

فالمقابلة الأولى واجه الكونغو وكان سباق للتسجيل عن طريق أحمد فرس قبل متعادل الكونغو، نفس السناريو تعاود فالمقابلة الثانية أمام السودان، فرس كيتقدم للمغرب والسودان كتعادل، فالمقابلة الأخيرة ضد الزايير نفس السيناريو مجددا بطريقة غريبة المغرب كيتقدم عن طريق أحمد فرس قبل تعادل الزايير.

نتيجة التعادل ف 3 مقابلات كان ممكن تأهل المغرب اللي تعادل مع الكونغو فالنسبة العامة والخاصة، وحسمات القرعة بالفلس تأهل الكونغو وإقصاء المغرب فالدور الأول فأول مشاركة ليه، بسناريو غريب وعجيب غادي يبقى متواصل طيلة سنوات فمشاركات المغرب.