كود – كازا //

كيف ما كانت كتنادي ݣود، المغرب بدا مرحلة جديدة باش ينظم الاقتصاد الرقمي، بعدما دخل نظام جديد حيز التنفيذ كيلزم الشركات الأجنبية اللي كتقدم خدمات رقمية للمغاربة، بحال نتفليكس، غوغل، ميتا، سبوتيفاي، Airbnb  وأوبر، باش تسجل عند مديرية الضرائب وتصرح بالمداخيل ديالها اللي كتجيبها من السوق المغربية، وتخلص الضريبة على القيمة المضافة (TVA)، حتى إلا ما كانش عندها مقر رسمي فالمغرب.

هاد النظام بدا الخدمة ديالو ابتداءً من 11 يونيو 2026، والهدف منو هو يوسع قاعدة الضرائب، وينظم الاقتصاد الرقمي، ويضمن أن الشركات الأجنبية والمحلية يخضعو لنفس القوانين الضريبية.

وبحسب القوانين الجديدة، خاص أي شركة أجنبية كتبيع خدمات رقمية للمستهلك المغربي تاخذ رقم تعريف ضريبي مغربي من منصة إلكترونية سميتها SIMPL، ومن بعد تعطي تصريح كل 3 شهور بالمداخيل اللي حققاتها فالمغرب، وتخلص الضريبة إلكترونياً قبل نهاية أول شهر من كل ربع سنة.

وزادت مديرية الضرائب فرضات على هاد الشركات تحتافظ بسجلات مفصلة على جميع المعاملات والخدمات اللي قدماتها وسط المغرب، باش تكون متوفرة إلى دارت الإدارة الضريبية أي مراقبة أو افتحاص.

ولتسهيل هاد الإجراءات، وفرتت المديرية دليل إلكتروني كيشرح بالتفصيل كيفاش الشركات الأجنبية تقدر تسجل، وتصرح، وتخلص الضريبة من منصة SIMPL.

هاد الخطوة كتعتبر جزء من تجديد النظام الضريبي المغربي، باش تخضع الخدمات الرقمية للقوانين الوطنية، وتحقق منافسة عادلة بين الشركات المغربية والمنصات العالمية، وفنفس الوقت تزيد من مداخيل خزينة الدولة مع فرض الضرائب على الخدمات الرقمية العابرة للحدود.