أميمة عطية – كود كازا ///
المغاربة على موعد غدا نهار الأربعاء 12 غشت 2026، مع ظاهرة كسوف شمسي جزئي غادي يكون كيتشاف من كاع مناطق المملكة بنسب متفاوتة، مع تسجيل نسب زايدا خصوصا فشمال البلاد.
ومع الاهتمام الكبير اللي كيعرفو هاد الحدث من عند المواطنين، خصوصا الناس اللي باغيين يتابعو الظاهرة الفلكية، كيبقى السؤال المطروح هو: شنو هي المخاطر اللي يمكن يتعرض ليها الإنسان إلا شاف مباشرة فالشمس فهاد الكسوف، واخا غير شويا ؟ وشنو الأعراض و النصائح لي خاصنا نديرو بها باش نتفاداو الأضرار ؟
وفهاد السياق، قالت الدكتورة رزقي سرين، اختصاصية فطب وجراحة العيون وتصحيح النظر وزراعة العدسات، فتصريح لـ”كود”، إن شوفان مباشرة فشمي في الكسوف يقدر تكون عندو آثار خطيرة على العين، خصوصا على مستوى الشبكية.
ووضحات الطبيبة رزقي ، أن الأشعة لي كتخرج من الشمس كتقدر توصل فلبلاصة لمومو لعين، وبالخصوص المنطقة الحساسة اللي كتسمى اللي عندها دور أساسي فالرؤية الدقيقة.
وكالت الاخصائية في جراحة العيون ، إن هاد الضرر معروف طبيا باسم عمى الكسوف أو اعتلال الشبكية الشمسي، بحيت كتعرض الخلايا الحساسة للضوء فالشبكية للتلف بسبب الأشعة القوية.
وأكدات الاخصائية في تصريحها ” كود” ، أن الخطورة الكبيرة فهاد الحالة هي أن الإنسان يقدر يتعرض للضرر بلا ما يحس بأي ألم، حيت الشبكية ما فيهاش مستشعرات ديال الألم، وبالتالي الشخص يقدر يبقى كيشوف للشمس وهو ما حاس بوالو، ف الوقت اللي كيتسبب فيه فضرر داخل عينو.
وحسب الدكتورة رزقي، فإن هاد الأشعة كتقدر تسبب لعمى فالمستقبلات الضوئية الموجودة فالشبكية، وهي الخلايا اللي كتساهم فاستقبال الضوء وتكوين الصورة اللي كيشوفها الإنسان.
وهاد التلف يقدر يأثر على النظر، وفي بعض الحالات يقدر يكون الضرر دائما وصعب أو مستحيل يتصلح بشكل كامل.
وزادت ضافت طبيبة ، أن الوضع مختلف على القرنية، اللي فيها الأعصاب المسؤولة على الإحساس بالألم، بينما الشبكية ما كتخليش الإنسان يحس مباشرة بالضرر اللي كيتسبب فيه النظر للشمس.
وبنسبة الأعراض ، لي تقدر تبان فلبلاصة وضحات الاختصاصية، أن الشخص اللي شاف شمس بلا ما ياخذ الاحتياطات اللازمة، يقدر من بعد يلاحظ مجموعة من الأعراض، من بينها تشوش أو ضبابية فالرؤية، ونقط كحلة فمجال النظر وما كتتحركش، إضافة إلى الصداع ونقصان فحدة النظر.
وبخصوص الناس اللي باغيين يتبعو الكسوف، شددت الدكتورة رزقي سرين على أن نضاضر الشمسية العادية ما كتعتبرش وسيلة آمنة لمشاهدة الكسوف، وما كتوفّرش الحماية المطلوبة من الأشعة اللي ممكن تضر الشبكية.
ونصحات المواطنين اللي باغيين يشوفو الظاهرة باش اديرو نضاضر خاصة بمشاهدة الكسوف، واللي كتكون مطابقة لمعايير السلامة الدولية ومجهزة بفيلتر خاص كيحجب الأشعة الضارة.
وأكدات أن نضاضر الخاصة خاصها تتحط قبل ما يهز الشخص راسو ويشوف للشمس، وما خاصوش يحيدها وهو مازال كيشوف فالشمس، حيت أي خطأ فهاد العملية يقدر يعرض العين للخطر.
