كود -كازا //

حسب موقع “صنداي وورلد” الجنوب إفريقي، المغرب ولى من أكبر الرابحين من التغييرات اللي وقعات فالتجارة ديال الأفوكا فالقارة، حيث قدر يفوت ط المنافسين ديالو ويجي لول فالصادرات الإفريقية لي طلعات ب 90% فـ2025 ي وصلات لـ141 ألف طن، وبهكا تصدر القارة لأول مرة.

صادرات إفريقيا من الأفوكا وصلات لـ430 ألف طن فـ2025، بزيادة 16.7%، وهاد النمو جا نتيجة الطلب الكبير من أوروبا والشرق الأوسط وبعض دول آسيا. وولات كفة السوق كتميل للمغرب بسباب تحسن البنية التحتية واستقرار النقل.

حتى الاضطرابات اللي وقعات حدا قناة السويس خلات الشارج يتحول لرأس الرجاء الصالح، وهاد الشي طول مدة النقل وزاد فالتكاليف، وضر بزاف دول شرق إفريقيا، كينيا تأثرات بزاف حيث الشارج الطويل كيأثر على جودة الفاكهة ومدة صلاحيتها، وكيضعف القدرة ديالها تنافس.

فالمقابل الموقع الجغرافي ديال المغرب عطاه أفضلية كبيرة، حيث الشارج من موانئ بحال طنجة المتوسط لأوروبا الجنوبية كيدوز غير فشي أيام، مقارنة بأسابيع بالنسبة لدول شرق إفريقيا.

وزاد المغرب قوى هاد التفوق بزيادة الإنتاج فخمس سنين الأخيرة، حيث توسعات زراعة الأفوكا بدعم من الاستثمارات فالسقي و افتتاح فريمات جداد فمناطق بحال سوس ماسة والغرب.

حتى لوزينات د التغلاف والتصدير تطورات وولات كتوافق المعايير الأوروبية، وهاد الشي سهل دخول المنتوج المغربي للأسواق العالمية.

الحاصول نجح المغرب يقلب الموازين ديال سوق الأفوكا فإفريقيا، وتفوق على المنافسين ديالو اللي كانو معروفين، وهاد الشي بفضل الجمع بين زيادة الإنتاج والسرعة فالوصول للأسواق ،اليوم اللوجستيك ولات عامل حاسم فالمنافسة، والمغرب عرف كيفاش يستغل هاد النقطة لصالحو.