كود –  أگادير //

المغرب مازال كيزيد يقوّي بلاصتو فالسوق ديال الخضرة فبريطانيا، وهاد الشي بان مزيان مع القلفلة الحلوة فتواخيرة ديال 2025 الصادرات ديال المغرب لهاد المنتوج تزادت بشكل كبير، حتى ولات مضوبلة مقارنة مع 2024، حسب معطيات شركة EastFruit.

الأرقام كتقول باللي بريطانيا شرات  8100 طن من الفلفلة الحلوة من المغرب فـ2025، وهادا رقم قياسي جديد، و من 2020 حتى لدابا، الصادرات طلعو بـ35 مرة، بنسبة نمو سنوية كبيرة وصلات لـ104%، وهاد الشي كيبين باللي الطلب كيكبر والمغرب كيعرف كيفاش يستغل الفرصة.

السوق البريطانية معروفة بالطلب المستقر ديالها واعتمادها الكبير على الاستيراد، هولندا كتسيطر ففصل الصيف، وإسبانيا فالشتا والربيع، وهاد الجوج مجموعين واخدين 83% من السوق، ولكن فلوقيتة من نونبر حتى أبريل، المغرب كيطلع بجهد وكيبدا ينافس حتى فرنسا وألمانيا وتركيا.

اللي زاد عطى دفعة للمغرب هو الثمن المناسب والتزويد المنتظم ففصل الشتا ،حتى لاخر شهر من 2025 وصل التصدير لرقم قياسي ديال 1700 طن، وقربات الحصة ديال المغرب لـ10% فداك الوقت، وفالمجموع المغرب ولى كيمثل 3.6% من واردات بريطانيا من الفلفلة الحلوة، بعدما كان غير 1.7% فـ2024، وهكا كيكون فات فرنسا وقرّب بزاف لألمانيا وطلع للمركز الرابع.

إلا بقى هاد النمو بنفس الوتيرة، المغرب عندو فرصة كبيرة باش يولي واحد من الموردين الكبار فهاد السوق، ويقدر يزيد يتلونصا فتصدير الفلفلة الحلوة لبريطانيا فلعوام الجاية.