كود – أگادير //

ف2025/2026، ضوبلات الصادرت من الفلفلة الحمرا ليغادا للنرويج جوج مرات مقارنة مع نفس الوقت من العام اللي فات، وهادشي كيبين باللي المنتوجات الفلاحية المغربية ولات حاضرة مزيان فأسواق شمال أوروبا.

وحسب منصة “إيست فروت” ، النرويج استوردات 620 طن من الفلفلة لحلوة  ما بين أكتوبر 2025 وأبريل 2026، بقيمة فاتت 3 ملايين دولار من المغرب ، هاد الرقم كيمثل ضوبل ديال الواردات اللي تسجلات الموسم اللي فات.

وزادت المنصة أن هاد الكمية دابا وصلات لكثر من 86 فالمية من مجموع صادرات الفلفو  لحلوة المغربية للنرويج فموسم 2024/2025 ، وهادشي كيعني أن المغرب غادي فطريقو باش يحقق رقم قياسي جديد فهاد السوق.

كيفما وضحات  “إيست فروت” أن السوق النرويجية كتعتمد بزاف على الاستيراد باش توفر حاجياتها من الفلفلة لحلوة ، حيث وصل مجموع الواردات ديالها ل 21.8 ألف طن ف 2024/2025. وخا أن هولندا وإسبانيا مازالين مسيطرين على السوق بحصة كتفوت 87 فالمية من مجموع الواردات، المغرب قدر يعزز الموقع ديالو على حساب موردين آخرين بحال تركيا واليونان وبولونيا.

هادشي سبابو حسب المنصة جودة الفلفة المغربية، والأثمنة المناسبة ، وكفاءة الشارج  والخدمات اللوجستيكية، اللي خلات المصدرين المغاربة يستافدو من تراجع بعض المنافسين، خصوصا إسبانيا اللي كتواجه ضغوط مناخية واقتصادية أثرتت على الإنتاج والصادرات ديالها.

نفس المصدر كيأكد أن هاد التطور كيعكس تحول  فالاستراتيجية التصديرية للمغرب، مني ولاو المصدرين المغاربة كيعتمدو  على التصدير ديريكت  لأسواق شمال أوروبا، بلا ما يدوزو من مراكز التوزيع الأوروبية التقليدية.