كود سبور//

حقق المنتخب الوطني المغربي الرباح على منتخب البنين، فماتش ودي اليوم الاثنين فتيران فاس الكبير، استعدادا لكأس أفريقيا 2025.

وقدر المنتخب الوطني المغربي يخرج رابح ضد منتخب البنين بنتيجة واحد لزيرو، وهو الهدف اللي ماركاه أيوب الكعبي مع نهاية الشوط الأول، مع العلم أن الماتش كان صعيب بزاف، والخصم ما كانش ساهل ورجع اللور كان كايحاول يغفل ليكيب ناسيونال.

وبالمقابل فالناخب الوطني وليد الركراكي دخل الماتش بتشكيلة مغايرة للتشكيلة اللي دخل بها الماتش الماضي ضد تونس، واليوم ضد البنين گلس أشرف حكيمي فالاحتياط وبونو والنصيري وبنصغير ودخل سفيان رحيمي وأيوب الكعبي والصباري الواحدي، ولكن فالوقت بدل الضائع نجح القناص أيوب الكعبي وماركا الهدف الوحيد للأسود.

وبقات النتيجة بين المنتخبين واحد لزيرو، بالرغم من التغييرات اللي دار وليد الركراكي، بحال ملي دخل مروان سندي وأشرف حكيمي وأسامة تيرغالين، وأمين زحزوح وبلال الخنوس والعزوزي، وكايبان من خلال ماتش اليوم أن المنتخب المغربي مازال خاصاه الخدمة على مستوى استغلال الفرص اللي كايخلق الهجوم وتحويلها لأهداف.