كود سبور//

تأهل المنتخب الوطني المغربي لأقل من 17 عام إلى ربع نهائي كأس العالم U17  فأندونسيا، للمرة الأولى بعدما ربح فثمن النهائي اليوم الثلاثاء المنتخب الإيراني.

وسالا الوقت الأصلي من الماتش بين المنتخب المغربي ومنتخب إيران بنتيجة التعادل واحد لواحد، وكانو الإيرانيين هما الأولين اللي ماركاو فالدقيقة 73 بضربة رأسية مباغتة، حيث الأشبال حيدو لهم خطورتهم، ولكن ليكيب ناسيونال ما كانوش محظوظين فالتسجيل حيث كورة الحموني دازت من حدا البوطو الإيراني، وكورة الناير ضربت فالبارا ديال مرمى الإيرانيين، قبل ما ينجح نسيم العزوزي فتسجيل التعادل للمغرب بهدف واحد فالوقت بدل الضائع بعدما بريبارا له زكرياء وزان الكورة بالراس وضربها لصقها فمرمى ايران قدام المدافعين الإيرانيين اللي بقاو كيتفرجو، وبعدها مشاو المنتخبين لضربات الترجيح، واللي ربحوها الأشبال بنتيجة 4 مقابل 1، وتألق الكول المغربي طه بنغوزيل فالبيلانتيات.

وبهذه النتيجة تأهل المنتخب الوطني المغربي إلى ربع نهائي كأس العالم لأقل من 17 عام، وغيلعبو الأشبال أمام منتخب مالي اللي تأهل بعدما ربح المكسيك، أما منتخب إيران ودع المنافسات من دور الثمن.