كود – كازا ///

المغرب حاضر بقوة فحملة ديال الانتخابات الأوروبية فمليلية للي مقررة نهار 9 يونيو الحالي. ومن بعد تصريحات رئيس الحكومة المحلية ديال المدينة اللي حاول يركب انتخابيا على قضية العبارة اللي بدلات سميتها على قبل المغرب. خرج بدوره هيرمان تيرتش، نائب رئيس فريق المحافظين والإصلاحيين الأوروبيين بتصريحات جديدة حول المغرب.

واعتبر السياسي اليميني عن حزب “فوكس” اليميني المتطرف، أن “المغرب غادي يحتارم إسبانيا مني الأخيرة تحتارم راسها”. وأضاف عضو البرلمان الأوروبي الحالي، أن “الأمر ما كيتعلقش بإهانة من ملك المغرب أو الحكومة ديالو، راهم كيديرو اللي خاصو يدار باش يدافعو على مصالحهم”.

وقال النائب الخامس لرئيس مجموعة المحافظين والإصلاحيين الأوروبيين (ECR)، إن “النهار اللي غادي يشوفونا المغاربة أننا كندافعو بقوة على راسنا، مغاديش يبقاو يتعاملو معانا بهذاك الشكل”.