گود سبور//

توج المنتخب الوطني المغربي بكاس العرب 2025، بعدما ربح المنتخب الأردني اللي كايدربهم المدرب المغربي جمال السلامي، وهذا الشي فـ الفينال ديال المسابقة اليوم الخميس فـ تيران لوسيل بالعاصمة القطرية الدوحة فـ ماتش كان واعر.

وسالا النهائي بين المنتخب الوطني المغربي والمنتخب الأردني بنتيجة 3-2 لمصلحة المغرب، ولكن الوقت الأصلي سالا بنتيجة التعادل الإيجابي 2-2، وماركاو المنتخب المغربي هما الأولين بواسطة اسامة طنان فـ الدقيقة 4، واللي ضرب هدف واعر من وسط التيران، والأردن ماركاو التعادل فـ الدقيقة 48 عن طريق علي علوان، ورجع نفس اللاعب وماركا الثاني للاردن من ضربة جزاء فـ الدقيقة 68.

ومن وراها دار طارق السكتيوي تغييرات باش يرجع فـ الماتش ودخل عبد الرزاق حمد الله وصابر بوگرين ومنير شويعر ومحمود بنتايك اللي عطاو انتعاشة للهجوم، وقدر عبد الرزاق حمد الله يماركي هدف التعادل للمغرب فـ الدقيقة 87، ومشاو المنتخبين للأشواط الإضافية.

وفـ الشوط الإضافي الاول نجح عبد الرزاق حمد الله تاني واستغل سوء التغطية ديال دفاع المنتخب الأردني وخطف كورة عطاها له سعدان وضرب الهدف الثالث ديال الرباح للمنتخب الوطني المغربي، واللي قدرو يحافظو عليه اللاعبين المغاربة اما الهجوم الأردني بقيادة المدرب جمال السلامي حتى سالا الشوط الإضافي الثاني والماتش.

وبهذه النتيجة توج المنتخب الوطني المغربي بلقب كاس العرب للمرة الثانية فـ التاريخ ديالو، بعد لقب عام 2012، وخدا جائزة 7 المليون دولار اللي هي البريم ديال بطل العرب.