محمد سقراط-كود///

المغربي معندوش موشكيل مع النصارة والأجانب عموما يبوسو ويعنقو، ومعندوش موشكيل مع الخليجي يدير سهرات الأورجي وكاين لي يقدر يتسخر عليه فيهم، ومعندوش موشكيل مع المثليين الأوربيين لي كيجيو للمغرب أو عايشين فيه ويقدر يخرج معاهم فابور أو بالخلاص، ولكن عندو موشكيل فاش كيشوف خوه المغربي المواطن الأسمر كيستمتع بحياتو وكيبوس ويعنق ويزهى ويعيش الحياة، وياكل مزيان ويضرب الطاسة ويسافر ويتكوبلا ويديرو الكونكوبيناج، هنا فين كيولي المغربي محافظ ومدافع على القيم المغربية والإسلامية، وكاين لي كينتاقل للخطوة التانية وكيبغي يغير المنكر طبعا في البدية بلسانه ومن بعد كيدوز ليديه ورجليه وسيفه وجنويته.

وهادشي لي كنشوفوه ديما في حوادث متنوعة، عمارة يسكنو معاهم كوبل أجنبي بلا كاغيط، مايتسوقوش ليهم ومكاين غير بونجوغ ميسيو بونسواغ مادام، وكاين شي منقديو ومرحبا بيكم في المغرب، وكي جاتكم الشمس ديال مراكش والزمت ديال فاس والبحر ديال صويرة وفلاك بيلس ديال أكادير، والى كانوا الكوبل مغربي كتلقاه جامع الجيران ومعتاصم ليهم حدا الباب بحال الى كلاوه في رزقوا، هاد السيمانة نيت شفنا مول الطاكسي في الرباط كيفاش عربط على كوبل مغربي بالسبان والمعيور والهدرة طايحة وكيهدد بلي غادي يديهم للكوميسارية حيت تعانقو ليه في الطاكسي، وأقسم بمن بعث محمد بالرسالة كون كانوا هادوك الكوبل نصارة مايهدر معاهم واخا يصاوبو ليه داني كربخال صغيور في الطاكسي.

والمغربي معندوش موشكيل حتى مع لي لاباس عليهم في المغرب يستمتعوا بحياتهم ديما كيردد لازمة هادوك صحاب الفلوس واش غادي نقدو عليهم حنا، ولكن ولد أو بنت حومتو مقودة عليهم بحالو وبغاو يعيشوا نمط حياة وبأفكار مختلفة عليه، هادوك خاص يفرض عليهم بالقوة يكونوا غارقين في الخرى بحالو أو يخويو لبلاد، ولكن للأسف هادي ماشي موشكلة هاد النوع من المغاربة بوحدهم بل موشكيلة الدولة لي كتعطيهم شرعية بالقوانين لي كتحد من الحريات الفردية وكتدخل في الأحشاء دالأمعاء ديال حياة المواطنين، ودايرة نصوص قانونية مهمتها هي تحرص على إستعمال مواعينك بالطريقة لي باغا الدولة وراضية عليها ماشي كيف بغيتي نتا أو نتي، راه المواطن المحساد لي داير راسوا حارس القيم والأخلاق راه غير كيقلد الدولة وكيجيب الشرعية من قوانينها، راه الدولة هي اللولة خاصها ماتبقاش داخلة في سوق راس المواطن باش يقيلوا خوه الحضاي.