گود سبور//

دخل الدولي المغربي عمر الهلالي، على خط أحداث العنف والعنصرية بتوري باتشيكو الإسبانية، والتزم الحياد وأكد أن اللي ارتكب شي جريمة من المهاجرين سوا مغاربة ولا غيرهم خاصهم يرجعوهم لبلادهم، وفنفس الوقت أكد أن المهاجرين والمغاربة كايتعرضو للعنصرية فالصبليون وعطى مثال به هو نيت.

وخلال حوار له مع betevé الإسبانية، هضر عمر الهلالي اللي زايد فالصبليون من أبوين مغربيين، وقال: “اللي كايديرو الجرائم وهم أقلية، خاصهم يرجعو للبلدان ديالهم”، مع العلم أن الهلالي وحسب نفس المصدر كان الأب ديالو هو الأول اللي جا للصبليون وقدر يجمع شويا ديال لفلوس ويجيب باقي أفراد العائلة قبل ما يتزاد عمر الهلالي فالصبليون وراه العائلة ديالهم دابا مكونة من 6 أفراد.

والدولي المغربي الهلالي، كشف أن العائلة ديالو المغربية، حتى هي كانت ضحية للعنصرية فالصبليون، وقال: “كانت الواليدة واحد المرة فالحانوت مع ولد خويا واتهموها بالسرقة، وملي وصلت عرفوها الوليدة ديالي، وكلشي تقلب وطلبو منها المسامحة”، وكمل الهلالي وقال: “راه ما يمكنش نبقاو نعانيو غير حيث شي مهاجرين مجرمين”.

وكمل عمر الهلالي ووضح أن الإجرام ديال الأجانب فالصبليرن ما عندوش ارتباط بالجالية المغربية والمهاجرين المغاربة، وقال: “راه اللي جايين هنا ماشي غير المغاربة، راه جايين من رومانيا وبزاف ديال البلايص، باش يخدمو وياكلو الخبر، ولكن كاينة أقلية ما عندهاش هاد الفكرة وجايين يشوهو سمعتنا (المهاجرين)”، وكمل اللاعب المغربي فأسبنيول وقال: “ما عرفتش القوانين ولكن اللي كايجي هنا وعندو فرصة باش يخدم وما باغيش يخدم ويستغلها خاصهم يرجعوه منين جا، واخا هذا الشي كايضرنا”.

وزاد عمر الهلالي، وهو كايهضر على العنصرية اللي كايتعرض لها، وقال: “راه اللي ما كايعرفش بلي أنا لاعب ديال الكورة، كايشوفيا بواحد الشوفة ناقصة بحالا درت 40 جريمة، وهذا الشي كايألمنا”.