وا عطيني الباي ديالييييي و لا نرونو ربها”
دابا لا كنتي دايز فالزنقة و سمعتي هاد الهضرة غايصحابك شي كوامانجي لقايجي مضارب مع الشيخة على فلوس الغرامة و لا شي قواد كلاو ليه القح*ب ” الباي” ديالو فشي اكرامية.
و لكن تخايلو معايا هاد الهضرة كاتخرج من فم راجل يكون عندو اكثر من ربعين عام موسطاشو يكتف شفار ! كتافو قد الجمل وكايعربط فالزنقة و يغوت على مو لي مرا كبيرة تكون عندها شي تمانين عام باش تعطيه حقو من” الورث”! هاد المنظر شفتو مؤخرا، الأم مهدودة، مريضة، لابسة جليليبة و دايرة درة و نضاضر وماقادا تا تمشى و ولدها مقابل معاها كشاكشو خارجين و الناس كايدفعو فيه و هوا والا بغا يحشم ” وا عطيني الباي ديالي”
كايغوت و يهلل باش يقنعها تبيع الدار لي ساكنين فيها و يقسمو الورث و تعطيه ” الباي” ديالو ! وا تصنط آ بعرور !
الفكرة ديال ” الورث” كاين عليها نقاش من شحال هادي بين مختلف التيارات السياسية و الاقتصادية ! ها لي كايشوف الورث نوع من أنواع الظلم الاجتماعي ها لي باغي الورث يطبقو عليه ضرائب صحاح ! أنا شخصيا كاتجيني الفكرة ديال الورث بحد ذاتها ماشي مشكلة حيت كايبقا وسيلة لتراكم الثروة عبر الأجيال! كاتلقا واحد لاباس عليه عندو وزين مخدم معاه ثلتالاف ديال الباشار نهار كايموت ماكايتسدش الوزين ! لا! كايجي ولدو “فادي” لي قرا فميريكان جايب معاه أفكار و تقنيات حديثة كايشد لوزين و كايضخ فيه دماء جديدة ! كايدير شراكات مع كليان جداد و كايولي داك لوزين مخدم ربعالاف ديال الباشار و كايتوسع ” فادي” و يكبر الثروة ديال باباه و كايزيد يخدم ناس اكثر و يخلق الثروة !و هنا الورث كايكون وسيلة فعالة لتطوير الاقتصاد ! حيت بابات فادي بدا المشوار و فادي مكملو و فاش غايجي ولد فادي تاهوا غايكمل داكشي لي بدا جدو و باباه، و اغنى العائلات عبر العالم ماجاتش وولات لاباس عليها ، بالعكس بناو الثروة ديالهم عبر الأجيال ….
و المصيبة هي انه أغلب الناس كاتربي ولادها على هاد الفكرة و كايخليوهم يشوفو فالورث حق من حقوق الابناء على الأباء، عوض ما يربيوهم على مبادئ فحال ” العمل”و ” المسؤولية” ! كايكبر البرهوش وهوا كايساين الورث ك “مكافئة” ديالو، بأي حق ؟! ماكاين بو الحق غي حيت هوا ولد فلان !بلاصة مايعول على راسو و يتعامل مع الحياة بمسؤولية اكثر ! لا كاتلقاه فاهم الفيلم بالمقلوب و كايساين الورث فحالا كايساين شي حق من الحقوق لي كايضمنهم ليه الميثاق الوطني لحقوق الانسان، كايصحابو راه من حقو يورث غي حيت هو “ولد فلان” و صافي ! راه مشروط على واليديه يكتبو ليه ! و يعطيوه ! و يخليو ليه بلا مايبدل ادنى مجهود ! كايتعامل مع رزق واليديه لي هوما لي ضربو فيه تامارا فحال شي ورقة ديال اللوطو مربوحة مربوحة طوال الوقت و لا قصار! و هاد الفكرة هي لي كاتخرج على بزاف ديال الناس و كاتخليهم عالات على راسهم و على اسرهم و على المجتمع ! هاد الفكرة لي كاتعطينا جيوش ديال المعوطلين و الشومورا و المعگازة لي باغينها باردة و هاكا كايولي الورث سبب فتسميم العلاقات بين الأب و ولدو و الأم و بنتها و كايعطينا عرام ديال العائلات لي كايضاربو فالخيط البيض عند نسيمة الحر على جوج قطارات و براكة ديال القصدير.
باش واحد يكون فايت ربعين عام و مازال كايتعرى على مو فالزنقة و يغوت ” واا عطيني الباي ديالي و لا نرون ربها” راه قمة الفشل ! قمة الحقارة و الانحطاط ! و مستحيل تعول على فحال هادا يشد داك الورث و يطورو و يزيد عليه.
بغيتيها باردة زعما ! بلا ماضرب لاتامارا ! ماتفيق بكري ! مادوز كونكورات ! ماضارب على طرف د الخبز غي نعس مع راساك و رتاح حتى لنهار يموت داك لي غاتورثو غادي تتمتع مع راساتك بخيرو و خميرو لي هوا ضرب عليه تامارا، واش ماشي قمة العبث و اللامسؤولية هادي؟
لي عندو الفلوس فهاد الوقت، راه احسن حاجة يمكن يديرها هي يتهلا فراسو و فولادو! يقريهم مزيان ! يعاونهم يوقفو على رجليهم و يخليهم يتحملو المسؤولية ديالهم بوحدهم ! فلوس الواليدين ديال الواليدين
موضوعات أخرى
