كود سبور//

مشاو المغاربة بمدينة أديلايد الأسترالية لمقر المنتخب الوطني المغربي لكرة القدم باش يموتيفيوهم وشكرهم على تشريفهم المغرب والكرة المغربية فكأس العالم للسيدات 2023، وخا الإقصاء من ثمن النهائي أمام فرنسا.

وبادرت الجماهير المغربية سوا من الجالية المقيمة بأستراليا أو المغاربة اللي مشاو لأستراليا من المغرب أو من مختلف أنحاء العالم، ومشاو لفندق المنتخب المغربي ملي سالا الماتش بين المغرب وفرنسا، وخلقو أجواء احتفالية مع اللاعبات المغربيات اللي كانو مقلقات وكيبكيو بعد الإقصاء.

الجمهور المغربي حاول يخفف على اللبؤات أجواء الحزن والإحباط اللي وسط لكيب ناسيونال بأغاني مغربية، باش يخرجهم من المرحلة الصعبة اللي دخلو لها بعد الاقصاء، وحتى اللاعبات ندمجو معهم باش ينسيو شوية مرارة الاقصاء من المونديال النسوي.

وكانت لاعبات المنتخب المغربي عبرو على الاحباط ديالهم والحزن الكبير لدرجة البكاء بسبب الخسارة القاصحة مع المنتخب الفرنسي فثمن نهائي كاس العالم، بالرغم من أن المغرب كيشاكر لأول مرة فهاد المسابقة، والوصول إلى ثمن النهائي فحد ذاتو انحاز للاعبات المنتخب المغربي اللي خسر مع فرنسا 4 مقابل 0.