كود سبور//

ربح العداء المغربي محمد المرابطي المرحلة الأولى من ماراطون الرمال فالدورة ديالو الـ39، واللي ربطت اليوم الأحد بين جبل إرحص وواد تجخت بإقليم الرشيدية على مسافة 32 كيلومترا.

وجا محمد المرابطي فالمركز الأول بعدما قطع مسافة السباق فمدة ساعتين و20 دقيقة و29 ثانية، وقال فتصريح له بعدما وصل لخط النهاية: “كيف ديما المرحلة الأولى كاتكون صعيبة شويا، حيث كاتحتاج لوقت باش تدخل فالريتم”.

وجا من ورا محمد، خوه رشيد المرابطي، حامل لقب النسخة الماضية من ماراطون الرمال، بفارق قصير، ودخل بتوقيت ساعتين و21 دقيقة و37 ثانية، بفارق قليل على دقيقة و8 ثواني ورا مول المركز الأول، وجا ورا رشيد المرابطي عداء مغربي آخر هو حميد ياشو، اللي احتل المركز الثالث بفارق دقيقة و34 ثانية فقط على مول المركز الثاني.

وفالمرحلة الأولى من ماراطون الرمال وباستثناء بعض الصعوبات، وخاصة الممرات الرملية والشقوق، كانت هذه المرحلة الأولى “سهلة” نسبيا.

أما عند العيالات، ربحت الفرنسية ماريلين نكاش المرحلة الأولى، وقدرت تقطعها فزمن  ساعتين و58 دقيقة و22 ثانية، متقدمة بفارق نحو 10 دقائق على منافستها المباشرة المغربية عزيزة العمراني اللي سجلت زمن 3 ساعات و08 دقائق و12 ثانية.

ونجحت الهولندية راگنا ديباتس، اللي تعتبر من بين المرشحات للفوز باللقب، (نجحت) وسالات المرحلة الأولى فالمركز الثالث بعد أن أنهتها في 3 ساعات و17 دقيقة و14 ثانية، بفارق 18 دقيقة و52 ثانية عن المتصدرة.

وكاتنظم النسخة 39 من ماراطون الرمال الأسطوري، تحت رعاية الملك محمد السادس، ما بين 4 و14 أبريل 2025 بقلب الصحراء المغربية.

وغايقطعو المشاركين فنسخة هذه السنة مسافة 250 كيلومتر، مقسمة على 6 مراحل، وهذه هي أطول مسافة على الإطلاق في تاريخ ماراطون الرمال، وفيها غايخلي حوالي 1000 عداء وعداءة من 52 دولة كل شي لتجربة مغامرة إنسانية ورياضية غاتخليهم يكتاشفو الجهد ديالهم.