كود سبور//

كايعيش الجمهور المغربي حالة من الترقب وهو كايتسنى قرار الجامعة الملكية المغربية لكرة القدم، بخصوص مستقبل الناخب الوطني وليد الركراكي، وشكون المدرب اللي غادي ياخد بلاصتو تأكد الانفصال عليه.

وحسب ما توصل به جورنال “گود” من مصادر مطلعة، وعلى بعد ساعات من اجتماع المكتب التنفيذي للجامعة الملكية المغربية لكرة القدم اليوم الخميس للتداول فمستقبل الناخب الوطني، فوليد الركراكي اكد للمحيط ديالو والناس اللي قراب منو انه ما غاديش يكمل مع المنتخب الوطني المغربي وما غاديش يكون فمونديال 2026، وحتى السطوري اللي بارطاجات ختو شهرزاد الركراكي على انستغرام مع نشر خبر انه القصة ديالو سالات مع المنتخب المغربي زاد اكد هذا الشي، مع العلم ان الجامعة الملكية المغربية نفت الانفصال عليه.

وحتى لدابا ما كاينش انفاصل بين الطرفين، وحتى واحد منهم ما خرج أعلن لفراق، فوليد الركراكي اللي المحيط ديالو كايخرج خبار نهاية القصة ديالو مع المنتخب الوطني المغربي، ما خرج هو كناخب وطني وطرف بحتى شي تصريح يلعن فيه الرحيل ديالو على المنتخب الوطني المغربي، ولا الجامعة الملكية المغربية لكرة القدم خرجت وأعلنت انه صافي غادي يمشي، بل العكس نفت الانفصال عليه بعدما نفت من قبل الاستقالة ديالو.

هذا الوضع الاستثنائي، مخلي الجامعة الملكية المغربية لكرة القدم، تحط سيناريوهات قبل اتخاذ اي خطوة واي قرار بخصوص مستقبل الناخب الوطني وليد الركراكي، ومنها الإعداد للمرحلة المقبلة، وحسب مصادر مطلعة تم الانفتاح على خيارات أخرى لتعويض الرحيل المحتمل لوليد الركراكي، ومنها التواصل مع مدربين منهم أجانب ومغاربة لقيادة المنتخب الوطني المغربي مستقبلا في انتظار الحسم مع الركراكي، ودابا كاين توجه نحو تعيين إطار وطني ماشي اجنبي، ومن ابرز المرشحين محمد وهبي اللي ربح كاس العالم للشباب مع المنتخب المغربي لاقل من 20 عام، واستبعدت المصادر طارق السكتيوي، وهذا الشي كامل في انتظار الحسم ديال المكتب الجامعي اليوم الخميس للقرار ديالو بخصوص الركراكي، اللي مازال حتى لدابا هو الناخب الوطني، حيث لا هو خرج أعلن على الرحيل ولا الجامعة الملكية المغربية لكرة القدم أعلنت الاستقالة ديالو او الانفصال عليه، بل على العكس نفت هذا الشي فجوج مناسبات.