أميمة عطية – كود كازا ///

واصلات البنوك المغربية تحقيق نتائج مالية مزيانة ف النصف الأول من عام 2026، مستفيدة من نمو نشاط القروض والودائع، فواحد الوقت لي ارتفعت فيه حتى الديون المعطلة بسبب عجز عدد من لكليان يخلصو فالوقت.

وكتبين الأرقام لي خرجات بها مجموعة من المؤسسات البنكية الكبيرة المدرجة فبورصة كازا أن القطاع البنكي مازال كيسجل نمو فالنشاط ديالو ومداخيلو، واخا تراجع القدرة الشرائية والصعوبات الاقتصادية لي كيعاني منها عدد من المواطنين.

مجموعة البنك الشعبي المركزي، سجلت ف النصف الأول من 2026 ارتفاعا فودائع الزبناء بنسبة 9 في المائة، وزيادة فالقروض بنسبة 5.7 في المائة. ولكن صافي الناتج البنكي الموحد تراجع بـ3.2 في المائة، باش يوصل لـ13.5 مليار درهم، مقابل 13.9 مليار درهم خلال نفس الفترة من العام لي فات.

وبالنسبة لـCIH Bank، وصلات المداخيل الصافية لـ2.82 مليار درهم خلال النصف الأول من 2026، بزيادة 2.8 في المائة على أساس سنوي.

أما BMCI، فحقق تحسن كبير فالنتائج ديالو، بعدما وصل صافي النتيجة الموحدة لـ354 مليون درهم، بارتفاع قوي بلغ 62.4 في المائة، خصوصا بفضل الانخفاض الكبير فتكلفة المخاطر. وصافي الناتج البنكي وصل لـ2.01 مليار درهم.

وسجلات ودائع زبناء BMCI بدورها 51.67 مليار درهم، بزيادة 2.2 في المائة مقارنة مع دجنبر 2025، بزيادة نقدية وصلت لـ1.12 مليار درهم.

من جهتو، سجل Bank of Africa ارتفاعا بـ1.5 في المائة فصافي الناتج البنكي الموحد، لي وصل لـ10.5 مليار درهم خلال النصف الأول من 2026. وبقا النشاط التجاري إيجابي، بعدما طلعات القروض بـ4.3 في المائة والودائع بـ4.1 في المائة.

ووصلات القروض الموحدة الممنوحة للزبناء، باستثناء عمليات إعادة البيع، لـ243.5 مليار درهم فمتم يونيو، بزيادة 4.3 في المائة مقارنة مع نهاية 2025، بينما ارتفعات على المستوى الاجتماعي بـ5.6 في المائة ووصلات لـ157.7 مليار درهم.

حسب معطيات بنك المغرب، رصيد القروض البنكية وصل فمتم يوليوز 2026 لـ1286.2 مليار درهم، بارتفاع سنوي بلغ 10.3 في المائة.

وفي المقابل، طلعات الديون المتعثرة بـ3.1 في المائة على أساس سنوي، ووصلات قيمتها لـ104.7 مليار درهم، وهي القروض لي ما قدرش أصحابها يسددوها فالآجال المتفق عليها. كما ارتفعات بـ3 في المائة مقارنة مع نهاية دجنبر 2025.