محمد سقراط-كود///

المغاربة عايشين في اكثر دولة مستقرة في المنطقة، اقتصاد مزيان ومستقبل واعد، وغادا تنظم كاس العالم، وفيها البراق، حقا الصحة والتعليم على القد الحال، ولكن كاين الامن والامان والاستقرار والوفرة في السوق عمرو عرفها المغرب في تاريخو، ومع ذلك الى تعرض على المغاربة التهجير لدول أخرى بحال كندا واستراليا وامريكا مقابل الجنسية، كنظن ان مناطق كثيرة في المغرب غادي تولي مهجورة، اذن علاش نفس هاد المغاربة ماباغينش فلسطينيي غزة يمشيو يدبرو على راسهم ويتحررو من سلطة حماس وقادتها لي كيجروهم لحروب خاسرة مدمرة في كل مرة.

أي واحد ساكن فشي بلاد دابا راه في واحد الوقت جا ليها من بلاصة خرى او جدودو هاجرو ليها، وحاليا كيعتابرها بلادو، وشحال من فلسطيني ولبناني وسوري هاجر بلادو ونجح في بلدان خرى، ومنهم لي رجع واحد من اغنى الناس في العالم، بحال كارلوس سليم واش كون بقى في لبنان كان غادي يولي شي حاجة، كون راه فلوسو حاجز عليها البنك دابا وخاصو يبراكي البنك باش يخرجها، وكاين لي رجع رئيس بلاد منتخب بحال الفلسطيني نجيب رئيس الهندوراس المحبوب، كون بقا في فلسطين كون راه حاصل تحت الركام، هذا مميعنيش ان كاع المهاجرين عادي ينجحوا ولكن بزاف كيخرجوا من داك الحفرة حياتهم كتحسن وبزاف، اذن علاش هاد الإصرار نن طرف ناس خريين غير معنيين على أن الغزاويين خاصهم يبقاو في غرة غي الصفوف الأولى في مواجهة آلة حرب فتاكة لي هي إسرائيل.

على مايبدو أن بزاف ديال العرب باغين يشوفوا الفلسطيني غير كيموت ودارو رايبة و ولادو مشردين ولكن يقاوم ويدافع لآخر رمق وهانية أنه متكونش عندو حياة او مستقبل، علاش مكتديروش احتمال انه كاين ناس في غزة طلعات ليهم هاد الحياة في راسهم وبغاو يعيشو ويديرو مستقبل لراسهم ولولادهم، وبغاو يكملو حياتهم في أمن وأمان بعيدا على الحرب والتدمير اليومي والصراع الغير متكافئ، راه ماشي ساهل انك تبني دار راه تقدر تدوز حياتك باش تبنيها وفي اللخر تريب عليك بسباب قرار ماشي ديالك، ومع ذلك كاين لي باغيك ترجع لداك الدمار والخراب وتبدى عاوتاني تبني داكشي حتى يعاود يريب فشي حرب وحدة خرى وهكذا دواليك، بينما هو عايش في بلاد مستقرة مرتاح في حياتو ولادو كيقراو مزيان وعندهم مستقبل وباغي الفلسطيني يبقى يقاوم وهو يتفرج فيه كيموت في الجزيرة.