سهام البارودي – كود//

المغرب مزيان من الناحية الاقتصادية و الاجتماعية ! الحالة غادة و كاترقع و ترقعات بزاف من الثمانينات لدابا و لكن للاسف هاد التطور الاقتصادي كاتواكبو واحد الموجة ديال التخلف الثقافي آمقودة ! خلاتنا غاديين باللورانية ! مارش آريير ! لدرجة شي حوايج ماكانش عندها فيهم مشكل فالثمانينات و السبعينات ولا فيهم مشكل و مشكل كبير دابا !

ماكانوش الناس فالثمانينات كايلبسو الدرابل فالبحر !
كانو العيالات كايعومو بالمايو دوبياس فعين الذياب و هانية حتى شي مهيمج مايقدر يحل فمو !
كان لي ماكايصومش رمضان تاواحد ماكايتسوق ليه !
كانو العيالات كايخرجو للزنقة بميني جيب و كسوة و صاية و سالوبيط و دجين باط ايليفون ! و حتى شي مهيمج مايمكن يحل عليهم زكو طبعا ! سواء مقتنع بداك اللباس او غير مقتانع بيه سواء مولف بيه او مامولفش بيه ا سوقو هاداك الاهم هوا انه كان ماكايتدخلش فاختيارات عباد الله !  كان التخلف و كانت الأمية و ماكانوش حقوق المرأة كيما دابا و كانت المدينة عامرة بضحايا الهجرة القروية و لكن واخا هاكاك كان واحد النوع ديال الاحترام كانفتاقدوه دابا ! بنادم داخل سوق كرو و المخزن فوق الجميع!

دابا لا ! ابنادم يقدر يحل زكو على اي حاجة ماهما كانت تافهة و ينشر الافكار الظلامية ديالو بكل أريحية حيت الكبت و التخلف و الاسلاميزم هاد الكوكطيل مولوطوڤ صنع لينا واحد الفئة كبيرة ديال هايشر ! لي كلمة ” كانبغيك” فوق من كاغيط ديال بيمو نوضات فيهم الريگاطا !

آه هوما قاليك شركة بيمو سالات شغلها ! و حققات الارباح ديالها و سيطرات على السوق المغربي و الافريقي و العالمي و صافي دابا ولاو الموظفين تما ماكايديرو والو لدرجة ولاو كايجتامعو بيناتهم باش يفكرو كيفاش ينشرو الرذيلة و الفسوق فالمجتمع المغربي الطاهر ! و كيفاش غاينشرو هاد الرذيلة ؟ واش شركة بيمو غاتولي تبني البورديلات عوض تصنع بيموات ؟ لا
واش شركة بيمو غاتبدا تمول بورن هوب باش تصنع ڤيديوات بورنو بالدارجة ؟ لا ! واش شركة بيمو خرجات الموظفين ديالها عريانين فشوارع كازا باش يديرو شي ڤيستيڤال ديال العرا فحالي كاين فسبانيا ! لا ؟

ايوا كيفاش غاتنشر هاد الفسق و الفجور ؟ قاليك آسيدي حيت كتبو ” كانبغيك ” فوق الكاغيط د بيمو !

ايوا الله يمسخكم يا الگنس المتخلف ! المكبوت ! المريض لي ماكايفرقش بين الحب وحاجة اخرى!