الرئيسية > آراء > المغاربة تاقوا في الدولة شاركوا في الانتخابات ودارو التلقيح بلا مايكون إجباري دابا الدولة خاص تيق فيهم وترخف الوقت واحد الشوية، راه من غير المعقول ان نصف السكان ملقحين وتوقف عندهم الحياة والأنشطة مع التسعود
18/09/2021 18:00 آراء

المغاربة تاقوا في الدولة شاركوا في الانتخابات ودارو التلقيح بلا مايكون إجباري دابا الدولة خاص تيق فيهم وترخف الوقت واحد الشوية، راه من غير المعقول ان نصف السكان ملقحين وتوقف عندهم الحياة والأنشطة مع التسعود

المغاربة تاقوا في الدولة شاركوا في الانتخابات ودارو التلقيح بلا مايكون إجباري دابا الدولة خاص تيق فيهم وترخف الوقت واحد الشوية، راه من غير المعقول ان نصف السكان ملقحين وتوقف عندهم الحياة والأنشطة مع التسعود

محمد سقرط-كود///

اليوم أكملت للدولة ديني ورضيت باخنوش رئيس حكومة، دابا الدولة مكتسالني والو صوت في الانتخابات درت الجرعة التانية ديال التلقيح، أنا والملايين ديال المغاربة إذن مكاين لاش تبقى سادة علينا في هاد الزامتة، حاليا كيبانليا بحال الى الدولة مشغولة بتسريع تشكيل الحكومة ونساتنا حاصلين في هاد الإجرائات ديال كورونا دماقبل التلقيح وهبوط أعداد المصابين، وبينما فئات كبيرة من المغاربة خدامين على راسهم وقاضيين غاراض واخا الزحام ومكاين لا وقاية لا كمامة، كاين فئة أخرى كلات لعصا ديال بصح بلا مايهدر عليها تاواحد، غير صحاب الحمامات راه ملي بدات كورونا لدابا يالله حلو فترة قصيرة وعاود سدو عاوتاني، الحمام اللخر راه كتلقى واحد عشرة حتى لعشرين أسرة عايشة معاه بداها من الحطابة والميخالة حتى للكسالة والمول الحمام، هادو فين مايخرج شي قرار هوما اللولين يسدو ليهم كأنهم هوما السباب المباشر لإنتشار كورونا، بينما القهاوي والسويقات والقيساريات والزرود ديال الانتخابات كلها هانية إلا الحمام.

القاعات الرياضية بزاف منهم دار إفلاس ودخل غير لآفيتو ولا فايسبوك ماركيت غادي يبانوليك صحاب القاعات الرياضية كيبيعو الماتريال ديالهم باش يقدرو يعيشو، وشحال من واحد فيهم سد نهائيا، مازال العراسات خدامين في النوار وقاضيين الغاراض شوية، المدن الساحلية الناس كرات بالغلا المحلات والحوانت باش يبيعو ويشريو في الصيف في اللخر قالوليهم تسدو مع التسعود من بعد مكانت الناس أصلا طامعين في الزيادة والسدان حتى ل11ناضو نقصو جوج سوايع، طبعا داك الوقت جات مع الأرقام الكبيرة للحالات والموت الكثيرة، ولكن عموما المغرب حاليا راه مخير لا من ناحية التلقيح أو المناعة الجماعية وحتى من ناحية الإيمان بالقدر، الناس متعايشين مع كورونا لي خداتو الله يرحمو والاحياء أولى من الأموات.

المغاربة تاقوا في الدولة شاركوا في الانتخابات ودارو التلقيح بلا مايكون إجباري دابا الدولة خاص تيق فيهم وترخف الوقت واحد الشوية، راه من غير المعقول ان نصف السكان ملقحين وتوقف عندهم الحياة والأنشطة مع التسعود، ولقوادة هي بحال لي ملقح بحال لي لا، مكاين حتى شي إمتياز عند الملقحين من غير أنهم يسافرو بلا رخصة لي أصلا كيسافر بلا بيها الأغلبية، تفكرونا شوية وفاجيوها علينا الصيف راه داز والتجمعات الليلة قلالت وبنادم غادي يولي يدخل بكري، وعلى الأقل غير تروج الوقت واحد الشوية والنفسية ديال الغنسان ترتاح مايبقاش يحس بانه مجبر يدخل مع التسعود، والحمام والقاعات الرياضية وقاعات الافراح سادين، فئة كبيرة من المجتمع كلات لعصا ديال بصح تفكروهم وتفكرونا راه عيينا وهاحنا مصوتين ملقحين وكالسين نتسناو.

موضوعات أخرى

23/10/2021 11:00

الناس عيات من السعاية فـ طوبيسات طنجة.. كيطلعو و فـ الطريق كاملة وهوما كيسعاو فاص أفاص مع الركاب اللي كرهو الطوبيس واللي يجي منو

23/10/2021 08:00

“سيدي كاوكي” نواحي الصويرة.. بعض المحظوظين خداو 500 هكتار على البحر واستغلو ميزانية المبادرة الوطنية باش دوزو طريق وسط الغابة كلفات الملاين – وثيقة و تصاور