كود : محمد سقراط//
على عكس الفقيه والفقيهة ديال الإصلاح والتوحيد ، ولي تبرئات منهم جماعتهم وناضت مشاكل عائلية عندهم ولفقيه الزوجة ديالو رفضات تعطيه إذن بالزواج ، وهادشي لي خلا المحكمة ترفض الطلب ، وكيفاش مساندهم تاواحد طيلة محنتهم علما أنهم بالنسبة لينا ماداروش شي جريمة لي يستحقوا عليها هادشي كامل ، ولكن بالنسبة ليهم ولأتباع ديالهم والمحيط ديالهم المتشدد فقد قاموا بجريمة خلات الجميع يتبرأ منهم وينبذهم ، ويواجهوا المحنة ديالهم بودهم ، علما أنهم هم لي داروها لراسهم ، بنشر هاد الفكر المتشدد لي كانوا ضحاياه ، على عكس آش معروف على المغاربة من تضامن فالمحن وتكافل وتسامح .
وهادشي لي ظهر فقضية سعيد الصنهاجي لي تعرض للإبتزاز طيلة سنوات على ود فيديو كان فيه عريان ، ومن بعد نشر الفيديو تكالب العديد عليه وعلى أبنائه ، ولكن عوض يتم اعتبار الأمر فضيحة وينبذه الجميع ، كما وقع للفقيه والفقيهة ، المغاربة العاديين والبسطاء ولي ماتوسخوش بالفكر المتشدد لي جاينا من الشرق ، أبانوا على أصالة وتضامن منقطع النظير ، وكلهم عاونوا الصنهاجي وتاواحد ماحكم عليه أو شاف فيه شوفة احتقار من بعد الإعتذار ديالو ، وعائلتو سانداتوا فالمحنة ديالو وصحابوا التفوا من حوله ، والفنانين المقربين ليه تضامنوا معاه ، من أجل الأسرة ديالوا وولادا ، وتى صفحات الفضائح فالفايسبوك كلها حذفات الفيديو ، استجابة لطلبه وللإعتذار ديالو ودغية تطوى الموضوع وبقى الصنهاجي فمكانتو كفنان شعبي محبوب عند بزاف ، وكولشي كيشكر فيه .
المغاربة الحقيقين هوما بحال عائلة الصنهاجي وصحابوا ، الناس لي بقاين محافظين على روح التضامن والتكافل لي كتميز المغاربة والتسامح ، وماشي هادوك لي مصنفين الناس بين صالح وطالح وبين تقي وفاسق ، حيث لي كيجمعنا هو الإنسانية ماشي التصنيفات الإثنية لي دخلية على ثقافتنا ، تجربة الصنهاجي بينات أن العديد من المغاربة باقي ماموسخينش بالفكر الظلامي لي حشى الأدمغة ديال العديد بالترهات الشرقية لي عمرها مكانت من تقافتنا ، المغاربة كيخطؤو كحال باقي البشر وكيتسامحوا بيناتهم ، وفكرة أنهم كيبقاو يجروا معاهم عار فضيحة لي هي أمر عادي فالأصل طيلة حياتهم كاينة غي عند الخوانجية وهوما لي باغين يسوقوها ويفرضوها على كاع المغاربة ، ولكن أسرة الصنهاجي وصحابوا والناس لي تضامنوا معاه بينوا على العكس.
موضوعات أخرى
