احمد الطيب – كود الرباط ///
علمت “كود” ان حزب الحركة الشعبية باغي يسول الحكومة الاثنين على مقال نشراتو وكالة المغرب العربي البارح الخميس 21 يوليوز 2022 للرد على حملة ضد رئيس الحكومة. لاماب كتبات ان رئيس الحكومة عزيز أخنوش وسياسته الرامية إلى ضمان استقرار القدرة الشرائية للمغاربة خلال مرحلة أزمة الأسعار، يواجه حملة على مواقع التواصل الاجتماعي” وقدمات “عشر نقاط رئيسية لفهم هذه الحملة المغرضة”.
هدرات على الفو كونت وعلي لكذوب وعلي تغليط الرأي العام وعلي سقوط “أخلاقيات العمل السياسي في بلادنا. وتضليل المواطنين العاديين يكون بهذا المعنى مستهجنا”.
دابا هاد الشي بغات تجبدو الحركة الشعبية وفريقها. واش تقدر؟ وفق مصدر “كود” باللي هاد الشي غير تخربيق. الوكالة كدير خدمتها. سياسي من الاغلبية قال ل”كود” باللي الخطير هو يدخل حزب سياسي هاد النقاش للبرلمان قبل ايام من عيد العرش “فين عمر الشراسة السياسية كتكون قبل عيد العرش. حتى فاقوى المعارضات فتاريخ البرلمان كانت كتفادى مواضيع بحال هادي كل ما قرب عيد العرش”.
المهم نتسناو ونشوفو اش غاديين يديرو الحركة الشعبية.
