أميمة عطية كود كازا ///

حلات مصممة الأزياء الراقية المغربية فضيلة الكادي باب جديد فالأناقة من بعدما فتحات بوتيك جديد فقلب مدينة طنجة ، فخطوة جديدة كتأكد الاستمرارية في تطوير علامتها الخاصة، باش تخلي الصناعة التقليدية المغربية حاضرة فتصاميم كتجمع بين الأصالة واللمسة العصرية.

هاد الفضاء جديد ، اللي كاين فـ 22 شارع خالد بن الوليد (شارع فيلاسكيز سابقاً) حدا مكتبة Les Insolites، ولي غادي يشهد على آخر إبداعات المصممة، وسط ديكور وهوية فنية كتعكس عالمها لخاص بها، من خلال قطع كتزاوج بين روعة التطريز المغربي التقليدي وخطوط الأزياء الراقية الحديثة.

هاد الاختيار ديال مدينة طنجة لافتتاح هاد لبوتيك، ما جاش صدفة حيت كتعتبر المدينة لي فيها لحضارات ومنفتحة على الفضاء المتوسطي وأوروبا وإفريقيا، وهو ما كينسجم مع رؤية فضيلة الكادي فإبراز الإبداع المغربي وتوسيع إشعاع علامتها.

وتعتبر فضيلة الكادي من الأسماء البارزة فمجال الأزياء الراقية المغربية، بحيت قدرت اكتر من عشرين عام تعرف بالتراث النسيجي المغربي خارج الحدود، بعدما تعرضات مجموعاتها فمدن عالمية بحال روما، نابولي، مدريد، لندن، أمستردام وبنما، مع حفاظها على التقنيات الحرفية الأصيلة اللي كتميز الصناعة التقليدية المغربية.

وكترجع بداية ارتباطها بعالم الحرفة والأزياء لسنوات ديال الطفولة، بحيت تزادت فضيلة الكادي فالمدينة العتيقة سلا، وسط أجواء قريبة من ورشات الحرفيين، الشي اللي خلاها تستلهم من التراث المغربي وتخلي من التطريز الرباطي بصمة خاصة فمشوارها الإبداعي.

وما وقفاتش تجربتها عند تصميم الأزياء فقط، ولكن اهتمات حتا بنقل المعرفة والحفاظ على الحرف التقليدية، بعدما أسسات سنة 2016 بمدينة سلا مدرسة متخصصة ففن التطريز، بهدف تكوين جيل جديد من الحرفيين والشباب المهتمين بمهن الصناعة التقليدية.