كود سبور- القاهرة//

خدامين المصريين كيوجدو تيران القاهرة الدولي لفينال كأس الكونفدرالية الإفريقية بين نهضة بركان والزمالك المصري، اللي غايتلعب هاذ الويكاند.

وفجولة رصدت كاميرا “گود” الاستعدادات اللي كيديروها المسؤولين على تيران القاهرة الدولي، بالتنسيق مع مسؤولين الزمالك المصري والاتحاد الأفريقي لكرة القدم، باش يكون التيران واجد للفينال من گاع النواحي تنظيميا وحتى من ناحية العشب، وكيسيوقو الكولوارات والدروج والكراسي ديالو باش يكون فأحسن حالة.

التيران اللي كاين وسط العاصمة المصرية القاهرة، واللي كيهز كثر من 74 ألف متفرج، كيستعد باش يحتضن جوج فينالات فسيمانا وحدة، الأول هو روتور فينال كاس الكونفدرالية الأفريقية بين نهضة بركان والزمالك غاد الاحد، والثاني برسم روتور فينال دوري أبطال افريقيا بين الأهلي المصري والترجي التونسي الويكاند الجاي.