كود سبور//

بداو المصريين الضغط ديالهم بكري وقبل ايام من فينال كاس الكونفدرالية الأفريقية لكرة القدم، بين نهضة بركان والزمالك باش يخدمو مصالح الفريق ديالهم، وكيتحركو باش يحرمو الفريق المغربي من خدمات اللاعب ديالو عمر العرجون.

وكيحاولو المصريين يروجو ان عمر العرجون ممنوع عليه يلعب فينال كاس الكونفدرالية الأفريقية مع نهضة بركان ضد الزمالك، بسبب الطرد اللي كان خداه فربع نهائي المسابقة ضد فريق بوسليم الليبي، وانه مازال ما استوفاش العقوبة ديال التوقيف حيث الماتشات بجوج ديال الدومي فينال اللي والروتور بين نهضة بركان واتحاد العاصمة الجزائري ما تلعبوش، وبالتالي فاللاعب ما عندوش الحق يلعب حسب المصريين والإعلام ديالهم اللي بدا خدام كيضغط بكري وقبل بكثر من 10 ايام على ماتش الفينال.

ومن جهة نهضة بركان، وحسب مصادر من داخل النادي، فعمر العرجون عندو الحق يلعب الفينال ديال كاس الكونفدرالية، ومن حق الفريق البرتقالي يستافد من الخدمات ديالو، حيث اللاعب التزم بالعقوبة والفريق ما كونفوكاهش فالماتشات بجوج اللي فاتو ديال الدومي فينال ضد اتحاد العاصمة الجزائري اللي ما تلعبوش، وان المشكل ماشي ديال عمر العرجون او ديال نهضة بركان حيث الماتشات بجوج ما تلعبوش، وكلشي عارف ان المشكل تسبب فيه الفريق الجزائري سوا فماتش الالي اللي قرر الكاف يلغيه بسبب احتجاز السلطات الجزائرية لتونيات نهضة بركان حيث فيهم خريطة المغرب وصدر القرار ديالو بأن النهضة ربح بـ3 لزيرو، أو ماتش الروتور اللي انسحب فيه الفريق الجزائري باش ما يلعبش ضد الفريق البرتقالي بسبب التوني اللي فيه خريطة المملكة المغربية وراه الحكام ومندوب الماتش دارو الرابور ديالهم بأن النهضة طلعو يلعبو والجزائريين ما بغاوش يلعبو، واكدت نفس المصادر ان اللاعب منحقو يلعب وما كيناش شي حاجة فقانون الكاف كتقول انه ما خاصوش يلعب.

وغايدخلو نهضة بركان الزمالك المصري فلالي ديال كاس الكاس الكونفدرالية الأفريقية يوم 12 ماي فتيران بركان، ومن بعدها غادي يمشيو يلعبو ماتش الروتور فمصر يوم 19 من نفس الشهر فتيران القاهرة الدولي.