كود سبور//

صبح الحضور إلى التيران الكبير فمدينة اكادير واللي كاين فمنطقة ادرار، (صبح) كايشكل خطر على الجمهور اللي كايجي يتفرج فالفرق ديالو، وخصوصا الفرق اللي جايا تلعب من خارج اكادير، وهذا الشي بسبب مجهولين كايضربو المشجعين بالحجر فمحيط الملعب.

البارح بالليل ملي سالا مات الرجاء الرياضي ومولودية وجدة برسم نصف نهائي كاس العرش، تعرض عدد من الجماهير اللي جات من كازا لأكادير باش تتفرج فالماتش وتدور وقت زوين، (تعرض) للرشق بالحجارة من طرف مجهولين خلال خروجهم من التيران وهما بالطوموبيلات ديالهم، وهذا الشي  تسبب فحوادث سير وضحايا، ومن بينهم مرات نوفل الزرهوني لاعب الرجا وبنتو، اللي حتى هما بحالهم بحال عدد من مشجعي الرجا كانو ضحية للرشق بالحجر من طرف مجهولين بمحيط التيران ملي سالا الماتش.

هذه الحوادث والاعتداءات على الجماهير ولات كاتكرر بمحيط ملعب أكادير، وبالضبط ملي كايكون ملعوب شي ماتش الطرف ديالو فريق من خارج المدينة، حيث وقعت البارح الثلاثاء من ورا ماتش الرجاء ومولودية وجدة، وقبل منها فماتش الاحد بين الجيش الملكي والمغرب الفاسي فالدومي فينال الاول ديال كاس العرش، فاش مجهولين بداو كايشيرو بالحجر على الجمهور فمحيط الملعب، والمتهم الاول هما شي عناصر محسوبين على جمهور حسنية أكادير، اللي عندهم عداء لجماهير من خارج أكادير وبالضبط لجماهير كازا وليفار.

ملي برمجت العصبة الوطني لكرة القدم الاحترافية ماتشات دومي فينال كاس العرش فأكادير، كانت مخاوف كبيرة من سيناريو تعرض جماهير الفرق المشاركة فهاد الدور لاعتداءات بالحجر فمحيط الملعب، وعدد من الجماهير استغربت من قرار العصبة برمجة الدومي فينال فهاد الملعب حيث كاين عداء ما بين جماهير حسنية أكادير مع جماهير الرجاء والجيش الملكي والمغرب الفاسي، والخطر اللي يقدر يشكلو هذا الشي على حياة المشجعين وساكنة المدينة، ومن وراها انطلقت على مواقع التواصل الاجتماعي حملات تحسيسية من بعض مشجعي حسنية أكادير اللي طالبوا الجماهير السوسية بالابتعاد على الحزازات مع جماهير الفرق اللي غاتجي تلعب فاكادير، خصوصا وان الحسنية ماشي طرف فالدومي فينال، وحذروهم من الدخول فشي أعمال شغب اللي تقدر تتسبب فسقوط ضحايا وبالحبس لمرتكبي هاد الأفعال، ونفس الشي بالنسبة لجماهير الجيش الملكي والمغربي الفاسي اللي دارت جمعيات مشجعة لهم اتفاق للحفاظ على الروح الرياضية كيفما كانت نتيجة الماتش، وبالنسبة للرجا فالنادي خرج ببلاغ دعا فيه الجماهير ديالو لاحترام ساكنة المدينة، قبل ما يتفاجأ كلشي بتعرض الجماهير للرشق بالحجارة بمحيط ملعب اكادير، ولكن واخا هذه المجودات والتنظيم ديال السلطات خرجو شي مجهولين وشيرو على الجمهور بالحجر فمحيط الملعب.

هذه الأحداث كتحط الجامعة الملكية المغربية لكرة القدم والعصبة الوطنية لكرة القدم الاحترافية فموقف صعيب، باش تختار ملعب لتنظيم فينال كاس العرش بين الرجاء الرياضي والجيش الملكي اللي أصلا الجمهور ديالهم بينهم عداء، وهذا الشي غايخلي السلطات تدير خدمة كبيرة يوم الماتش بين سلا والرباط وكازا حتى لاگادير فلالي والروتور إذا كان الماتش غايتلعب فمدينة أكادير لضمان تأمين المواطنين والممتلكات وتأمين المباراة باش تدور فظروف مزيانة، خصوصا وان أغلب الملاعب مسدودة دابا بسبب الإصلاحات الخاصة بتنظيم كاس أفريقيا 2025 ومونديال 2030، وحتى الوقت ما كاينش حيث الفينال خاصو يتلعب باش يسالي الموسم الرياضي بشكل رسمي فالمغرب والفريقين بجوج ياخدو عطلة ويبداو يوجدو للموسم الجاي اللي غايمثلو فيه الكورة المغربية افريقيا، وباس يبدا الاستعداد لانطلاق الموسم الجديد.

هذه الأحداث ديال الشغب كتزيد تأكد ان المجهودات الكبيرة اللي كايدير المغرب على مستوى البنيات التحتية وتطويرها للرفع من جودتها بهدف تنظيم التظاهرات العالمية الكبيرة، خاصها توازيها مجهودات كبيرة على مستوى تطوير العنصر البشري والدعم ديالو باش يقرا ويوعا، وتكون عدندو اهداف فالحياة، وما يبقاش بنادم يرهن حياتو وحياة غيرو بماتش ديالو الكورة اللي أصلا هي لعبة الهدف ديالها الاول ترفيهي، واللي حولوها مشاغبين محسوبين على جمهور عدد من الفرق فالمغرب قصدا او جهالا لوسيلة لإحداث الفوضى وارتكاب الجريمة كيفما وقع البارح فمحيط تيران اكادير.