كود ـ كازا//

المسيحيين المغاربة وجهو فبيان توصلات بيه “ݣود” رسالة شكر للرئيس دونالد ترامب على الدعم اللي قدمو للمغرب فجلسة مجلس الأمن واللي سالا بتبني الحل السياسي الواقعي لقضية الصحراء المغربية، هاد النجاح الكبير تحقق حسبهم، بفضل الرؤية الاستراتيجية والحكمة ديال الملك محمد السادس أمير المؤمنين.

وحسب نفس البلاغ، المسيحيين المغاربة دايماً متمسكين بالبيعة للملك محمد السادس، اللي كيعتبروه أمير لجميع المؤمنين المغاربة مسلمين، يهود ومسيحيين، وكيعيشو الإيمان المسيحي ديالهم بحرية تامة فبلادهم، بعكس بعض مناطق العالم اللي فيها اضطهاد للمسيحيين.

التنسيقية نبهات أن بعض الممارسات من طرف أشخاص من التيار ديال الإسلام السياسي كتخلق عراقيل، خصوصاً فممارسة الشعائر الدينية فالكنائس، اللي غالباً محصورة بالأجانب. وحسب التنسيقية، أغلبية المسيحيين المغاربة مولودين فهاد الديانة أو لقاو فيها الهنا والإيمان اللي كيقلبو عليه، وما عندهم حتى علاقة بالتنصير.

المسيحيين المغاربة طالبو بتفعيل مقتضيات الدستور الخاصة بحرية المعتقد وتطبيق توجيهات الملك محمد السادس فإمارة المؤمنين، مع حقوق إنسانية واضحة كتشمل السماح بإقامة الطقوس المسيحية فالكنائس الرسمية، الاعتراف بالزواج الكنسي، حرية اختيار الأسماء المسيحية للوليدات، التعليم الديني يكون اختياري، والدفن بالطريقة المسيحية.

وحسب التنسيقية، المغرب كيبقى نموذج للتعددية والانفتاح، وقيادة أمير المؤمنين كتضمن الحصانة ضد التطرف الديني، وكتحافظ على الوحدة والاستقرار ديال البلاد.