عمر المزين – كود///

كشفات مصادر موثوقة، لـ”كود”، أن عامل إقليم مولاي يعقوب، محمد سمير الخمليشي، حط رسميا أمام المحكمة الابتدائية الإدارية ففاس 6 طلبات لعزل رئيس جماعة مولاي يعقوب الحركي الشرقاني الحسني و5 أعضاء آخرين، منهم يوسف بابا النائب الأول للرئيس على خلفية ارتكابهم خروقات خطيرة.

المصادر قالت باللي العامل كينوب عليه فهاد الملفات الوكيل القضائي للمملكة اللي داير محل المخابرة ديالو مكتب الخازن الإقليمي ففاس، ودبا القضاء الإداري قرر باش يعين أولى جلسات للنظر فهاد الطلبات ديال العزل ابتداء من يوم 23 دجنبر الجاري.

قرار العامل وخا جا معطل لكن مزيان، في انتظار قرار توقيف رئيس جماعة سبع رواضي بنفس الإقليم اللي كانت جات عندو المفتشية العامة للإدارة الترابية اللي عمرها كتجي لشي جماعة غير هكاك.

كانت هضرة كثيرة باللي رئيس جماعة سبع رواضي كيروج أنه مغادي يديرو ليه والو. دبا غادي نشوفو العامل الخمليشي شنو غادي يقدر يدير.

يذكر أن توقيف رئيس جماعة مولاي يعقوب ومن معه جاء على إثر الزيارة للي كانت دارتها المفتشية العامة للإدارة الترابية، واللي دارت تقرير كحل يتضمن اختلالات خايبة عرفاتها هاد الجماعة التابعة ترابيا لجهة فاس مكناس.