كود سبور- طشقند//

أكد سفيان المسرار كابيتان المنتخب الوطني المغربي لكرة القدم داخل القاعة، أن المنافسة غاتكون قوية فمونديال الفوتسال فأوزباكيستان، ولكن كاينة حظوظ ديال ليكيب ناسيونال للذهاب بعيد فالبطولة.

وهضر سفيان المسرار وقال فتصريح لـ گود، قبل الحصة التدريبية ديال اسود الفوتسال اليوم الجمعة: “ديما الماتش الأول كايكون وهذا الشي اللي قال لنا المدرب هشام الدگيگ، وخاصنا نردو البال، والماتش الاول ديما صعيب حيث يالاه كاتولف وغانلعبو الحظوظ ديالنا كاملة وماتش بماتش واللاعبين عندهم الثقة وجينا بكري لأوزباكستان وما يكون غير الخير”.

وكمل كابيتان ليكيب ناسيونال وقال: “الضغط ديما كايكون و 24 منتخب اللي كاين كلهم باغيين يمشيو لأبعد نقطة ممكنة وغانلعبو ماتش بماتش وعازمين نمشيو بعيد ونفتو دور ربع النهائي اللي وصلنا له فالمونديال الماضي ويكون خير”.