كود – عثمان الشرقي//

المساخن، لي معروفة حتى بـ”راس الحانوت”، ولات هاد الأيام عليها النْفاد عند العطارين ، لي كيعتبروها المغاربة ماشي غير تخليطة ديال لعشوب والتوابل للدفا فالشتاء. ولكن كيعتبروها منشّط جنسي طبيعي، وكيتزاد عليها الطلب خصوصاً فالبرد، من عند الرجال لي كيقلبو على الطاقة والنشاط بطريقة طبيعية وبدون كيماويات.

المساخن كتجمع أكثر من 40 نوع من الأعشاب: سكين جبير، الگوزة، الفلفلة، القرنفل، الحلبة، الزعتر، الهال، والشيح. هاد لعشوب كتسخّن الجسم، كتزيد الدورة الدموية، وكتعطي واحد النشاط البدني لي الناس كيعتبروه محفّز للرغبة الجنسية، خصوصاً بعد أكلات تقليدية بحال الرفيسة،والثريد.

استعمال المساخن عندو جذور قديمة فالتراث المغربي، كيرجع لقرون، وكانو كيتحضّرو خصيصاً لنفيسات مورا الولادة، والمرضى ولي عندهم السخانة الباردة ، هاد الخلطة كانت وما زالا كتدخل فالأكلات الشعبية باش تعطي للطاقة وتحافظ على صحة الجسم، وشي مرات كانت كتستعمل حتى لتحفيز النشاط البدني والقدرة على الحركة، الشي لي خلى الاعتقاد الشعبي يربطها لاحقاً بالنشاط الجنسي.

ميمون عطّار معروف فخنيفرة ، كيأكد أن الرجال كيجيو بزاف يسوّلو على المساخن لي كتزيد الطاقة. كاين لي كيبغي تخليطة مجهدة ، وكاين لي كيبغيها خفيفة باش ما تأثرش على القلب أو الضغط.كيضيف أن الطلب كيطّلع فالشتاء حيت الناس كيبغيو يسخنو مع عيالاتهم.

شهادات المغاربة كتأكد هاد الشي. سمير، موظف فخريبݣة، قال: “منين كنشرب المساخن ، كنحس براسي دافي والطاقة ديالي كتزيد، وهادشي كيحسّسني بالنشاط فالعلاقة الزوجية.” فاطمة، ربة بيت، كتقول: “كنوجد المساخن فداري ، كنحس بدفا ، وراجلي حتى هو كيولي ناشط و فرحان ”

أسماء زريول، أخصائية تغذية، كتأكد أن بعض الأعشاب كتعاون على تنشيط الدورة الدموية والطاقة، وبالتالي كتقدر تزيد النشاط الجنسي. ولكن كتشدّد على أن الإفراط ممكن يضر القلب، الضغط، الكلي، وخصوصاً النساء الحوامل والمصابين بأمراض مزمنة. العبار الموصى بها هو ملعقة صغيرة يومياً.

الناس لي كيستهلكو المساخن كيشوفوها “فياغرا طبيعية”، كتزيد الطاقة والحيوية وكتقاد المورال. بزاف منهم كيشربوها مع البلول، وكيعتبروها محفّز طبيعي بلا كيماويات. الظاهرة جزء من الثقافة الشعبية المغربية، كتجمع بين التقاليد وفوائد الأعشاب الطبيعية، ولكن المتخصصين كينبهو بلي المساخن ماشي دوا، والتأثير ديالها محدود وكيخص الاستعمال بالقياس.