كود – وكالات//

خرجات المحكمة الجنائية فباريس اليوم الاثنين حكم كيدين شركة الإسمنت الفرنسية “لافارج” و 8 من المسؤولين ديالها السابقين بتهمة تمويل الإرهاب،  من بعد ما تبيّن باللي خلصو الفلوس ل 3 ديال التنظيمات الجهادية، من بينها تنظيم داعش، وصلات ل 5.6 ملايين يورو ف 2013 و2014، باش يبقا لوزين ديال سيما خدام وسط الحرب فسوريا.

المحكمة لزمات الشركة تخلّص غرامة اللي كتوصل لـ1.125 مليون يورو، وفنفس الوقت تحكم على الرئيس التنفيذي السابق برونو لافون بالحبس 6 سنين ، كما خرجات أحكام بالحبس  فحق 7 مسؤولين خرين، مابين ما بين 18 شهر و7 سنين.

وأكدات رئيسة المحكمة إيزابيل بريفو-ديبريه باللي هاد التمويل ساهم فتمويل داعش باش دير عمليات إرهابية من بينها هجمات يناير 2015 ففرنسا، واعتبرات باللي الشركة دارت “شراكة تجارية حقيقية” مع التنظيم.

وكانت الفلوس كتتخلص بجوج طرق الأولى باش يتشراو مواد أولية بحال الهيدروكربونات، والثانية باش الخامة والسلعة يدوزو من نقاط التفتي ، والمتهمين دافعو على راسهم وقالو باللي كانوا ضحايا ديال الابتزاز، ولكن المحكمة رفضات هاد الرواية، واعتمدات على رسائل داخلية كتهضر على “مفاوضات” و”اتفاقيات”.

وخا ملايين اليورو اللي تخلصات، سمحو فلوزين  نهار 18 شتنبر 2014، بعدما طاح فـيد داعش ، والتحقات بالقضية كطرف مدني عائلات ضحايا هجمات 13 نونبر 2015، اللي كتشوف باللي الشركة كانت واحد من “المموبين” فآلة الإرهاب اللي ضربات فرنسا فداك الوقت.

“لافارج” كانت تشراّت فـ2015 من طرف المجموعة السويسرية “هولسيم”، وسبق ليها دارت فـ2022 اتفاقية اعتراف بالذنب مع الجانب الأمريكي، وخلصات  خطية وصلات لـ حتى778 مليون دولار.