كود الرباط//

المحطة الطرقية فالعاصمة الرباط، تسييرها كارثي، كلها فضايح، هاد المحطة مزوقة من برا، ولكن فداخل غير “الخنز والماء مقطوع” وهادشي كثر من جوج صيمانات. ولكن هاد الايام مكاين غير الصباغة والتزواق مع اقتراب تنظيم كاس افريقيا.

فضايح المحطة، وصلت لمؤسسات رسمية، وكانو رسائل توجهو للجهات الرسمية قصد التدخل ومحاسبة المسؤولين على هاد المحطة بسباب الاختلالات وناهيك عن تدبير كراء المحلات.

المحطة مور ما دشنها سيدنا غشهر نونبر 2022،  تم إطلاق 3 طلبات للعروض لكراء 35 محلا تجاريا إلا أنها أسفرت فقط على كراء 10 محلات، والسبب هو أن السومة الكرائية طالعا بزاف مقارنة مع محطات القطار.

من غير سوء النظافة وغيرها، فحتى الخدمات ضعيفة، ولأن المسافرين لي كيجيو المحطة من فئات اجتماعية هشة، لا يعقل يتباع ليهم المنتوج بثمن غالي حيث الكراء ديال محلات غالي.

معطيات حصلت عليها “كود” تفيد بلي أغلب مستغلي  هذه المحلات غارقين فالكيرديات وعندهم عجز بسبب الاثمنة ديال الكراء لي غاليا، ولكن كاينا “الانتقائية”، فمثلا 3 محلات ديال البقالة بوحدها لي كتعرف الاقبال، حيث مولاها “يقال بلي عندو شبكة علاقات ووو”. غير هادي خاص يتحاسب عليها مدير المحطة.

مشكلة أخرى كتواجه عدد من المحلات التجارية، هو أن المسافرين العابرين من الرباط يتم منعهم من الولوج إلى الطابق العلوي للمحطة، وبالتالي مكاينش الرواج.