كود سبور//

عبرت المغربية خديجة المرضي بطلة العالم فالبوكس على الفرحة ديالها حيث تأهلت لربع نهائي أولمبياد باريس2024، وهدات هذا التأهل للملك محمد السادس والمغاربة، وأكدت أنها هي والملاكمة وداد برطال غايديرو كل ما فجهدهم باش يطلعو لمنصة التتويج.

وبعدما تأهلت إلى ربع نهائي أولمبياد باريس قالت خديجة المرضي فتصريح لها: “الكومبا كانت صعيبة حيث الملاكمة البريطانية كانت قوية وتقنيا كتعرف كيفاش تربك الخصم، ولكن الخسارة ديالي فالجولة الأولى ما كانعتبرهاش أنا خسارة بل كانت تحليل للكومبا باش نعرف كيفاش نخدم فالجولة الثانية والثالثة باش نربح الكومبا كاملة”.

وكملت خديجة المرضي: “عرفت كيفاش نخدم أنا والمدربين، والجمهور كان فصالحي حيث كايشجعني والمغاربة كانو معيا، وهادي غير البداية ومازال الفرحة جايا اللي غاندخلو بها البوديوم ضد الأسترالية، وكنهدي هذا الرباح للملك محمد السادس بمناسبة عيد العرش وغنادير كل ما فجهدي باش نزيد نفرح ملكنا والمغاربة، وأنا ووداد برطال باش نكونو فالبوديوم والعلم الوطني يكون خفاق فباريس”.