كود – كازا //

كيواكب المرصد المغربي لحماية المستهلك، بقلق كبير وغضب شْديد، داك الشي اللي كيدور فدوّار المش التابع لجماعة بنمعاشو فإقليم برشيد ،تيقول المرصد انه كاين واحد الحالة ديال  الدجّال المسمى بـ“الشريف مول البركة” تحوّل من سارح الغنم لواحد اللي كيدّاعي  بلي “كيداوي جميع الأمراض”، فمشهد خطير وعبثي كيهين العقل والعلم والقيم الإنسانية و كيقول بلي  كيعالج السرطان وأمراض صعيبة، وكيستغل آلام المرضى واليأس ديال عائلاتهم، خارج أي إطار علمي ولا قانوني.

وحسب المعطيات المتوفرة المعني بالأمر كيتستقبل ما بين 400 و500 واحد فنهار، بلا حتى شي ترخيص ولا تكوين، وبلا أي مراقبة صحية ولا إدارية، وكيشد مقابل هاد الشي فلوس كتيرة، وكيحول معاناة الناس لمصدر ديال الاغتناء الغير المشروع هوهو والسماسرة ديالو، كاع هاد الشي كيدوز فغياب تام ديال المراقبة، وكيشكّل خطر مباشر على الصحة العامة، خصوصاً ملي كيتوهّمو مرضى السرطان بلي الشفاء ممكن بوسائل خرافية، الشي اللي يقدر يخلّيهم يوقّفو العلاج الطبي المعروف علمياً، وهاد الشي عواقبو خطيرة ويقد يوصل حتى لفقدان الأرواح.

وبناءً على هاد الشي، المرصد المغربي لحماية المستهلك كيطالب بتدخّل عاجل باش يدار حد لنشاط الإجرامي، ويفتح تحقيق قضائي معمّق مع هاد الشخص واللي متورط ولا متواطؤ معاه، ويتسدّ ويتشمّع المكان اللي كيتدار فيه هاد النشاط وفق المساطر القانونية، مع حماية الضحايا وتمكينهم من التبليغ والمؤازرة القانونية. وكيدعو حتى لتشديد المراقبة على بؤر الدجل والشعوذة اللي كتتخبّى ورا “العلاج” باش تنهب فلوس الناس، وزيد عليها حملات تحسيسية وطنية تحذّر من مخاطر الدجل الطبي.