كود – وكالات//

مصادر صحفية كويتية كتقول باللي مجتبى خامنئي، المرشد الجديد ديال إيران، تصاب بجروح خطيرة فالقصف الجوي اللي كان على طهران نهار 28 فبراير، وحسب جريدة كويتية، الردم ديال المباني اللي طاحت عليه فالضربات ديال إسرائيل ومريكان سببات ليه ضربات قوية.

وكتضيف الجريدة الكويتية باللي خامنئي الصغير تنقل لروسيا فوق طيارة عسكرية روسية، بعدما فشلو الأطباء فإيران على علاجو، ديك ساعات مشا  لموسكو فين دار عملية جراحية فواحد السبيطار بريفي حسب التسريبات.

وحتى لدابا مزال ما بان حتى ظهور علني ولا تسجيل صوتي لـمجتبى خامنئي، الشي اللي خلا بزاف ديال المتابعين والمحللين يتساءلو واش مازال قادر يمارس النفوذ ديالو وسط النظام الإيراني ولا الحرس الثوري لي كيحكم باسمو.

فالمقابل رئيس الوزراء الإسرائيلي بنيامين نتنياهو خرج بتصريحات قال فيها إن إسرائيل عندها معلومات دقيقة على الحالة الصحية ديال خامنئي.

التقارير نفسها كتقول باللي الإصابات اللي تعرض ليها ممكن تكون أخطر من اللي تسرّب للإعلام، حيث الضرر وصل من الرأس حتى الرجلين، وفنفس الوقت مازال السلطات الإيرانية ما خرجات حتى تأكيد رسمي بخصوص مغادرتو للبلاد.