الوالي الزاز -كود- العيون///
وصلات المديرة التنفيذية المساعدة ديال لبرنامج الأغذية العالمي World Food Programme، فاليري نيوسم گارنييري، للجزائر البارح الثلاثاء 14 ماي 2024، فإطار زيارة كديرها للجزائر حتى لنهار 16 ماي الجاري.
ومن المنتظر أن تمتد زيارة المديرة التنفيذية المساعدة ديال لبرنامج الأغذية العالمي World Food Programme، فاليري نيوسم گارنييري، حتى لمخيمات تندوف فالساعات القادمة باش تطالع على الوضع فالمخيمات وتلاقى قيادات فجبهة البوليساريو.
هاد الزيارة لمخيمات تندوف الهدف منها هو لقاء قيادات البوليساريو والوقوف على الوضع الإنساني فمخيمات تندوف، خاصة مع تراجع منسوب المساعدات الإنسانية الموجهة ليهم وتخلف الدول المانحة عن الوفاء بالتزاماتها تجاههم، والوضع الإنساني المزري فيها بسباب النقص الحاصل فالغذاء وانعكاساتو على شريحة كبيرة بحال الأطفال والنساء والنساء الحوامل وكبار السن، ونقص المياه.
ويشار أن برنامج الأغذية العالمي World Food Programme هو اللي مكلف بهاد المساعدات الإنسانية ويتحكم فيها من خلال تسلمها وإدارتها وتسليمها للمعنيين مباشرة، وذلك خوفا من أن هاد المساعدات تلاقي نفس مصير مساعدات كتعطى خارج إطار هياكل الأمم المتحدة المختصة وكتباع من طرف قيادات البوليساريو فالأسواق الموريتانية والأفريقية.
