كود بني ملال//

داز حوار بين لجنة ساكنة دواوير “إكمير” بجماعة أيت عباس والكاتب العام ديال عمالة أزيلال، لبارح لاربعا 10 شتنبر، والنتيجة كانت إطلاق سراح أكثر من 20 محتج وقفهم السيمي فدخلة ديال المدينة ، فالمسيرة الاحتجاجية لي كانت غادية لمقر العمالة باش يطالبو بالخدمات الأساسية.

السلطات واعدو المحتجين باش يشوفو مطلب إنشاء ليسي كوليج فإكمير، وقالو أن المشروع واجد، ولكن كاين مشكل فملكية الأرض المخصصة للبناء. وزادو تعهدو باش يقلبو على مطلب تعيين طبيبة وقسم للولادة بتنسيق مع الجهات المختصة، وزادو حتى مطلب توفير طراكس باش تخفف من أضرار فيضانات الواد لخضر.

من بعد ما تفكو الموقوفين ورجعو العيالات ودراري اللي خرجو فمسيرة ثانية تضامناً مع ولادهم، عبرو السكان على فرحتهم ولكن، وقالو أن اللي كيتسناوه دابا هو تنفيذ هاد الالتزامات على الأرض، باش يسالي التهميش اللي دام سنين ويضمن ليهم حقوقهم وقالو عاوتاني أنهم غادي يبقاو كيترافعو ببنفس الطريقة السلمية باش يوصلو مطالبهم العادلة فالتعليم والصحة والبنيات التحتية.
وفنفس السياق، طريقة التعامل ديال السلطات مع المحتجين طلعات الدم لفعاليات حقوقية ومحلية، وطالبو برفع التهميش عن المنطقة بتنمية ديال بصح.