المخرج ادريس شويكة ////
تاريخ الانسانية هاكدا داير، شي يبني وشي يريب…
الرومان بناوا حضارة كدها كداش مدة قرون ومشات من أروبا حتي لإفرقيا الشمالية وجاوا الهمج ديال الوندال وهدمو كلشي في سنوات قليلة، لعرب يناوا حتى هما حضارة كبيرة في العراق والشام وجا هولاكو وقبايل الماغول وريبوا كلشي بالزربة، قوم ضربوا تمارة باش يبنيوا حضارة ومدينة نمودجية بحال “بالمير”، جاوا قوم خرين هدموا داك شي لبناوا مدة قرون في رمشة عين !.. ناس بناوا مدينة جميلة بحال “حلب” خلال قرون حتى هما، وجا بشار وصحابه غربوها في سويعات قلال !..
وهادا هو حال الدنيا وتاريخ البشر… وحتى على مستوى صغر وقرب لينا، كاين لي كيبني وكاين لي كيهدم… ناخد مثلا مجال لي قريب لي وكنعرفو مزيان : السينما والتلفزيون… جا نور الدين الصايل للتلفزة المغربية في الثمانينات وتبع سياسة مزيانة ديال الإنتاج والبرمجة وضعات الأساس ديال تلفزيون محترم بإنتاج وطني محترم، من بعد جا سي فيصل لعرايشي وهدم كلشي وتبع سياسة مبنية على تهميش وإقصاء المهنيين وعلى الرشوة والمحسوبية والزبونية، يعني سياسة “باك صاحبي” لي ميعات الإنتاج الوطني… مشى نور الدين الصايل لدوزيم في التسعينات وتبع عاود سياسة مزيانة بنات دوزيم على أساس صحيح بعدما كانت قريبة دير فاييت، وجا من بعد سي بنعلي ثم سليم الشيخ لي تحالف مع لعرايشي وتبع حتى هو سياسة “باك صاحبي” وريب الحفلة… ومشى الصايل للمركز السينمائي المغربي في 2003 وتبع سياسة طورات الإنتاج السينمائي المغربي لي وصل لمعدل ديال اكثر من 20 فيلم في العام وكسبات الأفلام المغربية مكانة مزيانة في أغلب مهراجانات العالم، وجا سي صارم الفاسي الفهري وهاهو كالسك كيرب في الحفلة حتى هو، الله إحد الباس وخلاص…